Արցախի Ազգային ժողովում ֆինանսների նախարար Վահրամ Բաղդասարյանը ներկայացրեց «Պետական պաշտոններ զբաղեցնող անձանց վարձատրության մասին» օրենքում լրացումներ և փոփոխություններ կատարելու մասին օրենքի նախագիծը։
«Նախկինում որոշ պաշտոնյանների պաշտոնային դրույքաչափերը չէին համապատասխանում որդեգրած այն սկզբունքին, որ Արցախի Հանրապետության պետական պաշտոնյաների վարձատրության գործակիցը պետք է հավասար լինի Հայաստանում համապատասխան պաշտոն զբաղեցնող պաշտոնյայի 80%-ին։ Ունենք ընդհուպ մինչև 50% գործակիցներ, և այս օրենքի փոփոխությամբ առաջարկում ենք նաև այդ անհամապատասխանությունը ուղղել։ Եվ այդ համապատասխան պաշտոնյաներին համապատասխանեցնել Հայաստանի Հանրապետության իրենց գործընկերների՝ նույն պաշտոնյաների 80%-ին»,- ասաց նա։
Արցախի ժողովրդավարական կուսակցությունից Գեղամ Ստեփանյանը իր ելույթի ընթացքում նշեց, որ պետական համակարգի արդյունավետությունը բարձրացնելու տեսանկյունից պատշաճ վարձատրությունը կարևոր նշանակություն ունի․ «Զարգացած երկրների փորձը հուշում է, որ արդյունավետ պետական համակարգ ունենալու համար պետական աշխատողների բարձր վարձատրություն սահմանելուն զուգահեռ պետք է օպտիմալացնել համակարգը, բացառել կրկնվող գործառույթներով հաստիքները։ Սակայն, առաջարկվող նախագիծը ոչ միայն շեղված է այդ տրամաբանությունից, այլ ավելին՝ ստեղծվում են կրկնվող բովանդակությամբ և գործառույթներով նոր հաստիքներ։ Գաղտնիք չէ, որ այսօր ունենք ծանրաբեռնված պետական համակարգ, և հանրության շրջանում ամենաշատ քննարկվող հարցերից է այն, որ համապետական ընտրություններից հետո պետական համակարգը ավելի է ուռճացվել»։
Նա հայտնեց, որ Արցախի ժողովրդավարական կուսակցություն խմբակցությունը դեմ է քվեարկելու նախագծին։ Վահրամ Բաղդասարյանը կրկնեց, որ նախագիծը աշխատավարձերի բարձրացում չի նախատեսում։
Կարդացեք նաև
«Պարոն Բաղդասարյան, այնուամենայնիվ 8 գործակցի փոփոխությունը 9.6-ի իրենից ենթադրո՞ւմ է աշխատավարձի փոփոխություն, թե՞ ոչ»,- հետաքրքրվեց Գեղամ Ստեփանյանը։
«Այո՛, բայց ինքը համապատասխանեցվում է գործող սկզբունքին։ Նորից եմ ասում՝ այդ մարդը պետք է ստանար 9.6-ը 8-ի փոխարեն»,- պատասխանեց Վահրամ Բաղդասարյանը։
Քվեարկությամբ կողմ 24, դեմ 8 ձայներով նախագիծը ընդունվեց։
Ամի ՉԻՉԱԿՅԱՆ
