Ջիվան Գասպարյան կրտսերը՝ օտարների հետ համագործակցության ու La Fabrica-ում խորովածի մասին
Ջիվան Գասպարյան կրտսերը կարանտինային շրջանն օգտագործել է նոր նախագծերի վրա աշխատելու համար: Օգոստոսի 30-ին էլ «Ֆրեսկո» փառատոնի շրջանակում հանդես կգա իր խմբով: «Առավոտի» հետ զրույցում դուդուկահարն ասում է, որ թյուր է տպավորությունը, թե Հայաստանում չէ: Հավելեց, որ նախկինում էլ վեց ամիս ԱՄՆ-ում է ապրել, վեց ամիս Հայաստանում: Առաջին մենահամերգը Հայաստանում կայացել է երկու տարի առաջ, հյուրախաղեր է ունեցել Հայաստանի պետական ջազ բենդի հետ, ցանկություն ուներ այս տարի եւս յուրահատուկ ծրագրով մենահամերգ ունենալ, սակայն կորոնավիրուսի պատճառով այն տեղափոխել է հաջորդ տարի: Ասում է՝ հիմնականում արտասահմանցի երաժիշտների հետ է աշխատել, այս պահին էլ չինացիների հետ է համագործակցում, որոնք ցանկանում էին հայկական դուդուկ հնչեր:
Ջիվան Գասպարյան կրտսերն ասում է, որ շատ նախագծերում է ներգրավված: Դրանցից մեկը ցյուրիխյան մի նախագիծ էր, որին 57 երկրից մի քանի հարյուր երաժիշտ հայտ էր ներկայացրել, սակայն նրանցից միայն 27-ին են ընտրել, որոնցից մեկն էլ ինքն է: Երկու սկավառակ են թողարկել, երկրորդի պրոդյուսերը «Գրեմմի մրցանակակիր» Լարի Քլեյն է, հարվածային գործիքները՝ Յամահայի ներկայացուչիչն է, կիթառահարը Մայքլ Ջեքսոնի հետ էր աշխատել: Պատմում է, որ 15 օր ապրել են Մարսելի La Fabrica ստուդիայում:
Հիշում է, թե ինչպես է աֆրիկուհիների հետ «Ով սիրուն, սիրունը» կատարել: Պատմում է նաեւ, թե ինչպես է արտասահմանցի արտիստների համար հայկական խորոված պատրաստել իր ձեռքով: «Հայրս խոհարար է եղել, ես կարողանում եմ համեղ պատրաստել, խոհարարությունը հորիցս է գալիս, դուդուկ նվագելը Ջիվան Գասպարյանից՝ պապիցս»,-ասում է երաժիշտը:
Կարդացեք նաև
Ջիվան Գասպարյան կրտսերը նշում է, որ շատ երաժիշտներ այժմ էլ ցանկանում են գալ Հայաստան համերգների, սակայն հովանավորների եւ աջակիցների խնդիրներ են ծագում, մինչդեռ նույնանման նախագծերը «դրսում» ավելի հեշտ են կազմակերպվում: Ասում է, օրինակ, անցյալ հայաստանյան համերգին ինքն է հոգացել երաժիշտների ծախսերը:
Հանրահայտ պապին՝ Ջիվան Գասպարյանին էլ անդրադարձ եղավ մեր զրույցի ժամանակ: «Ջիվան Գասպարյանն ասում է, որ իր հաջողության գրավականն այն է, որ նվագել է զուտ մաքուր հայկական երաժշտություն……Ինքը միշտ ինձ ասում է՝ քեզ մոտ իմպրովիզացիան շատ լավ է ստացվում, բայց դու էլ հայկական մաքուրը նվագիր, ես դրանով եմ նկատվել եւ ճանաչվել: Ինքը շատ բծախնդիր է այդ հարցում»,-նշում է Ջիվան Գասպարյան կրտսերը: Հավելում է, որ պապն իրեն առանձնահատուկ խորհուրդներ չի տվել, ինքը ամեն ինչ սովորել է՝ պապին եւ ծնողներին աչքի առաջ ունենալով: Նրա խոսքերով, պապը դաստիարակվել է Թաթուլ Ալթունյանի անվան երգի-պարի անսամբլում, ասում է՝ Ալթունյանի նկարն էլ կախված է տանը. «Ջիվանն ասում է՝ Ալթունյանը մեզ սովորեցնում էր ամեն ինչ՝ դանակ-պատառաքաղ բռնելուց մինչեւ բեմական կուլտուրա»:
Մեր զրուցակիցը հայտնեց, որ պատրաստվում է առաջիկայում առցանց համերգներ իրականացնել արտասահմանցի երաժիշտների հետ համագործակցությամբ, որը բարեգործական բնույթ կունենա, ցանկանում է հանգանակվելիք գումարն ուղղել բանակին ու մանկատներին: Հիշեցնում է՝ պապիկն էլ է մանկատան սան եղել:
Ջիվան Գասպարյանը նաեւ տեղեկացրեց, որ դուդուկի տեսքով ֆլեշ-կրիչներ են արտադրում, որոնք գեղեցիկ հուշանվեր կլինեն հատկապես արտասահմանցի հյուրերի համար եւ կխորհրդանշեն Հայաստանը:
Գոհար ՀԱԿՈԲՅԱՆ
Լուսանկարները տրամադրել է Ջիվան Գասպարյան կրտսերը:
«Առավոտ» օրաթերթ
19.08.2020
