Այսօր լրագրողների հետ հանդիպման ժամանակ ՀՀԿ փոխնախագահ Արմեն Աշոտյանը, խոսելով Հայաստանում Եվրամիության նախկին դեսպան Պյոտր Սվիտալսկու «Հայկական հեղափոխություն» գրքի մասին, ասաց՝ գիրքը կարդացել եմ, «մանիպուլյացիոն էր, բազմաթիվ երեսպաշտ դրսեւորումներով»:
Ըստ Աշոտյանի, Սվիտալսկին ԵՄ վատագույն դեսպանն էր Հայաստանում եւ նրանից ավելի բան սպասել հնարավոր չէր:
Արմեն Աշոտյանը նախընտրեց գրքի մասին խոսել հարցերով. «Ուզում եմ հասկանալ նա ԵՄ դեսպա՞նն էր, թե՞ այլ շրջանակների: Օրինակ` պարոն Սվիտալսկին, չգիտես ինչու, չի գրել իր հիշողությունները Նիկոլի Բրյուսել առաջին այցի եւ Եվրոպական հանձնաժողովի նախագահ Ժան-Կլոդ Յունկերի հետ ապուշ խոսակցությունների մասին, թե օլիգարխներից գրպաններից գումարները կստանամ: Ինչո՞ւ Սվիտալսկին չի նկարագրել, որ այդ հանդիպումից հետո ինքը Հայաստանում հանդիպել է լրատվամիջոցներին եւ բաց տեքստով դժգոհել Նիկոլից: Ինչո՞ւ չի նկարագրել այն փաստը, որ Եվրոպական խորհրդի նախագահ Դոնալդ Տուսկը եւ Ժան Կլոդ Յունկերը Սերժ Սարգսյանին շնորհավորել են վարչապետ ընտրվելու կապակցությամբ, իսկ ինքը երկու օր ուշացումով է տվել այդ շնորհավորանքը: Իսկ ինչո՞ւ չի նշում, որ ինքը եվրոպական բարձրաստիճան պաշտոնյաներին որպես պաշտոնական տեղեկանք տրամադրում էր Սորոսի Հայաստանի գրասենյակի տված գնահատականները: Ինքը ո՞ւմ դեսպանն էր, ո՞ւմ լոբբիստն էր»:
Արմեն Աշոտյանը խոստացավ հրապարակել փաստաթուղթ, որն ապացուցում է, որ Պյոտր Սվիտալսկին Բրյուսելին պաշտոնական տեղեկանքի տեսքով ուղարկել է ԲՀՀ գրասենյակի գնահատականներն ու վերլուծականները:
Կարդացեք նաև
Նելլի ԳՐԻԳՈՐՅԱՆ
