Լոռեցի կամավորականները նույնպես շարունակում են ներկայանալ պահեստազորայինների նախնական հավաքակետ, որ իրենք էլ կանգնեն սահմանում ծառայող տղաների կողքին: Վաղ առավոտից մինչեւ ուշ երեկո, մարդիկ գալիս ու հերթագրվում են, սպասելով՝ ճակատ մեկնելու իրենց հերթին:
Իսկ նրանց կողքին՝ Վանաձորի տարբեր հատվածներում կարելի է հանդիպել մարդկանց, որոնք մնալով թիկունքում, փորձում են իրենց ներդրումն ունենալ երկրի խաղաղության գործին: Զինվորների ու Արցախի բնակիչների համար Վանաձորում նույնպես հավաքում են սնունդ, դեղորայք, հագուստ ու առաջին անհրաժեշտության պարագաներ:
Առաջին իսկ օրվանից Վանաձորի Հայքի հրապարակում, Տիգրանը՝ մի խումբ երիտասարդների հետ նախաձեռնեց առաջին անհրաժեշտության իրերի հավաքագրում:
Կամավորականներից մի երիտասարդ, որը չցանկացավ ներկայանալ, ասաց, որ այս պահին ավելի շատ կա՝ տաք հագուստի, գլխարկի, ձեռնոցների, քնապարկի ու ծխախոտի կարիք. «Սկզբի 4 օրն ակտիվությունն ավելի մեծ էր, հիմա մի փոքր ավելի պասիվ են, բայց մենք մինչեւ վերջ շարունակելու ենք: Արդեն 4 ավտոմեքենա տարել ենք ՀՀ-ի սահմաններում, եւս 4-ը Արցախի Հանրապետություն ենք տարել: Բացի այդ տեղում ծանոթանում ենք նաեւ Արցախից եկած ընտանիքիների կարիքներին, որից հետո այդ ընտանիքիներին ապահովում ենք անհրաժեշտ իրերով»:
Կարդացեք նաև
Կամավորականներից Մենուան էլ վստահեցնում է՝ բոլոր իրերը հասնում են իրենց հասցեատերերին. «Քառօրյայի ժամանակ բոլորս էլ տեսանք, որ կան բաներ, որոնք չհասան զինվորներին, դրա համար մենք մեր ձեռքով տանում ենք առաջնագիծ: Հիմա անհանգստություն չկա, մենք տեղեկացնում ենք, թե քանի մեքենա որտեղ տարվեց, որ սնունդը ուր հասավ, որ մարդիկ տեղյակ լինեն»:
Ալլա Ղազարյանն էլ «Պարգեւիր ժպիտ» խմբի ղեկավարն է: Այժմ իր թիմի հետ իրականացնում է հագուստի հավաքման աշխատանքներ: Բացի այդ, իրականացնում են նաեւ մաքրման աշխատանքներ, այն տարածքներում, որտեղ պետք է ապաստանեն Արցախից ժամանած մեր հայրենակիցները. «Մեր կամավորական ջոկատով իրականացնում ենք հագուստի եւ այլ անհրաժեշտ պարագաների հավաքագրում: Ինչպես նաեւ տարածքներում, որտեղ մնալու են Արցախից եկած մեր բարեկամները, կատարում ենք նաեւ՝ մաքրման, հարդարման ու կահավորման աշխատանքներ: Անհրաժեշտության դեպքում նաեւ ճաշարանում ենք օգնում: Այս կերպ փորձում ենք մեր աջակցությունն էլ ցուցաբերել»:
Տաթեւիկ ՂԱԶԱՐՅԱՆ
