«Դատարանից որեւէ սպասելիք չունեմ, ցավոք կարծում եմ, որ դատարանը Աշոտ Մինասյանի կալանքը կհաստատի: Սա Հայաստանում սկսված քաղաքական բռնաճնշումների, ռեպրեսիայի շղթայի մի օղակ է: Աշոտ Մինասյանն այն անձնավորությունն է, որը ողջ կյանքով ապացուցել է, որ ծառայում է Հայաստանի Հանրապետությանն ու Արցախին, պատերազմի առաջին օրվանից նա գտնվում էր առաջնագծում՝ իր ջոկատով, որն 90-ականների պատերազմից հայտնի ջոկատներից մեկն է եղել: Եվ դա եղել է միակ դիրքը, որը մնացել է անառիկ, եւ որը ադրբեջանական բանակը չի գրավել:
Սա դասական քաղաքական հետապնդում է, եւ այսօրվա դեռեւս իշխող վարչախումբը՝ Նիկոլ Փաշինյանը եւ իր ողջ այսպես կոչված քաղաքական թիմը, մեկ միլիոներորդականը չեն արել այն ամենի, ինչ արել է Արցախի համար Աշոտ Մինասյանը, որն իմ մարտական ընկերն է եւ մեր ժողովրդի պարծանքը»,-լրագրողների հետ զրույցում ասաց ԱԱԾ նախկին տնօրեն Դավիթ Շահնազարյանը:
Դավիթ Շահնազարյան
Նա եւս դատարանի մոտ էր, որը քննում է Արցախյան երեք պատերազմների մասնակից, լեգենդար Սիսական ջոկատի հրամանատար, գնդապետ, «Մարտական խաչ» 2-րդ աստիճանի շքանշանակիր Աշոտ Միանսյանի ձերբակալման իրավաչափության հարցը:
Դավիթ Շահնազարյանը հավելեց. «Ավելի քան վստահ եմ, որ քիչ ժամանակ է մնացել, երբ Աշոտ Մինասյանն իր բանտախուցը կզիջի Նիկոլ Փաշինյանին»:
Կարդացեք նաև
ԱԱԾ նախկին տնօրենի ձեւակերպմամբ, այսօր Հայաստանը, Արցախը եւ ողջ հայ ժողովուրդը ունեն մեկ խնդիր՝ օր առաջ պաշտոնից հեռացնել պետական դավաճանություն գործած Նիկոլ Փաշինյանին: «Ես դեռ մայիս ամսին հրապարակայնորեն պահանջել եմ, որպեսզի գլխավոր դատախազությունը նյութեր նախապատրաստի եւ մեղադրանք հարուցի Նիկոլ Փաշինյանի հանդեպ՝ պետական դավաճանություն հոդվածով: Ես շատ եմ ցավում, որ մեր հասարակության մի զգալի հատված դեռեւս չի հասկանում, չի ընկալում աղետի այն մասշտաբները, որում այսօր գտնվում ենք: 1915 թ ցեղասպանությունից հետո սա ամենամեծ աղետն է հայ ժողովրդի համար, որը իրականացնում է հետեւողականորեն Նիկոլ Փաշինյանն արդեն 2,5 տարի…
Այսօր ոչ միայն կապիտուլյացիոն փաստաթուղթ է ստորագրվել Հայաստանի անունից, այլեւ ստորացված ենք, որ հանդուրժում ենք այսպիսի իշխանություն: Պատմության մեջ դեռեւս այնպիսի դեպք չի եղել, որ նման դավաճանությունից հետո որեւէ իշխանություն մտածի մնալ: Իսկ այսօր նա ասում է՝ կամ Հայաստան չի լինի, կամ ես պետք է լինեմ Հայաստանի ղեկավարը: Եվ միաժամանակ միջազգային հանրությունը պետք է հստակ տարանջատի Հայաստանի Հանրապետությունը Նիկոլ Փաշինյանից: Նիկոլ Փաշինյանը ոչ իրավական, ոչ քաղաքական հիմք չունի խոսելու Հայաստանի Հանրապետության անունից: Եվ փորձում է այսպիսի բռնաճնշումներով, քաղաքացիական պատերազմի սպառնալիքներով քարշ տալ իր դավաճանական իշխանությունը»,-ասաց Դավիթ Շահնազարյանը:
Գոհար ՀԱԿՈԲՅԱՆ
