«Երկիր Մեդիա» հեռուստաընկերության քաղաքական և լրատվական ծրագրերի տնօրեն Գեղամ Մանուկյանն անժամկետ հացադուլ է հայտարարել: Այդ մասին նա տեղեկացրել էր ֆեյսբուքի իր էջում:
Մինչ լրագրողների հարցերին պատասխանելը՝ նա նախ հանդես եկավ հայտարարությամբ` ներկայացնելով համաշխարհային պրակտիկայում հացադուլների ձեւերը, որոնք ուղղված են թշնամու եւ օտարների դեմ:
«Այսօր ես անժամկետ հացադուլ եմ հայտարարում ոչ թե օտար հարստահարիչի դեմ, այլ մեր երկրի վարչապետի հրաժարականի պահանջով»,-ասաց Գեղամ Մանուկյանը:
«Վարչապետը, որը ստորագրել է միայնակ, առանց խորհրդակցելու որեւէ մեկի հետ, ստորագրել է ստորացուցիչ կապիտուլյացիոն հայտարարություն, ով երկուսուկես տարվա ընթացքում պոռոտախոսությամբ է հանդես եկել, կազմալուծել է պետական կառավարման համակարգը, նվաստացուցիչ պայմաններով ստորագրել է փաստաթուղթ, երբ հնարավորություն ուներ ավելի լավ պայմաններում զինադադար կնքել պատերազմի տարբեր փուլերում: Մեր հայրենիքի մեծագույն մասը թշնամուն հանձնած մարդը պետք է օր առաջ հեռանա»,-ասաց «Երկիր Մեդիա» հեռուստաընկերության քաղաքական և լրատվական ծրագրերի տնօրենը:
Կարդացեք նաև
Նա վստահ է, որ կորցրածից դեռ ինչ-որ բան հնարավոր է փրկել, եթե Փաշինյանը հեռանա, սակայն շարունակում է կառչած մնալ աթոռին. «Նա պատրաստ է զոհաբերել բոլորին, միայն մնա, ես միանում եմ մեր Գարիկ Ավետիսյանի պահանջին, որը նույնպես հացադուլ է անում կառավարության շենքի մոտ»:
Երբ Գեղամ Մանուկյանը խոսում էր, նրան մոտեցավ մի քաղաքացի ու ասաց, որ 50 օր է՝ ԴՆԹ անալիզ է հանձնել, ցանկանում է եղբոր դիակը տանել թաղել, սակայն նրան ոչ մեկը չի օգնում: Կառավարության շենքի մոտ ինչ-ինչ մարդիկ փորձում էին սադրել հացադուլավորներին ու լրագրողներին:
Գեղամ Մանուկյանը հավելեց, որ Նիկոլ Փաշինյանի խմբակցության շատ պատգամավորներ եւս էկրաններից այն կողմ, անձնական շփումներում ասում են, որ Փաշինյանը պետք է հեռանա, բայց դա կկայանա միայն այն դեպքում, երբ հրաժարականը դառնա համահայկական պահանջ: «Երկիր Մեդիա» հեռուստաընկերության քաղաքական և լրատվական ծրագրերի տնօրենը կարծում է, որ իր հացադուլը կարող է արդյունավետ քայլ լինել. «Ամեն մեկը պայքարի ինչ-որ միջոց է փնտրում է, սա վերջին միջոցն է, որին դիմում է շարքային քաղաքացի Գեղամ Մանուկյանը»:
Նա շեշտեց, որ հայտարարություն անելու համար հատուկ է ընտրել Արամ Մանուկյանի արձանի մոտ գտնվելը, քանի որ նա Հայաստանի առաջին հանրապետության հիմնադիրն է, մինչդեռ Նիկոլ Փաշինյանի կառավարությունը ձգձգում էր Արամ Մանուկյանի արձանի բացումը:
«Դաշնակցական հարյուրավոր կամավորներ, այդ թվում իմ որդին՝ Արամ Մանուկյանի արձանի մոտից մեկնեցին առաջնագիծ եւ շարունակում են մնալ այնտեղ»,-ասաց նա, ապա շարժվեց կառավարության շենքի մոտ:
Director for news and political programs at Yerkir Media TV, member of ARF Gegham Manukyan goes on an indefinite hunger strike demanding the resignation of the RA Prime Minister in front of the RA Government’s building of Yerevan, Armenia
Նրան սկզբում ոստիկաններն արգելում էին կանգնել կառավարության շենքի առաջ:
Գեղամ Մանուկյանն անդրադարձավ նաեւ լուսանկարվելու համար Արցախ մեկնած ՀՀ պաշտոնյաներին, որոնցից շատերը պատերազմի օրերին ուղղակի հյուրանոցում էին անցկացնում: «Անհնար է, որ Ադրբեջանի իշխանության դեմ այս իշխանությունը նստի ու բանակցի…Երկիրը եւ ժողովուրդը չի պարտվել, պարտվել է այս իշխանությունը»,-շեշտեց նա:
Իրավապաշտպան Ավետիք Իշխանյանը լրագրողների հետ զրույցում ասաց, որ երբ իմացել է Գեղամ Մանուկյանի հացադուլի որոշման մասին, առաջին անգամ որոշել է հորդորել նրան հրաժարվել այդ մտքից: Ավետիք Իշխանյանի խոսքով, այն անձը, որի հրաժարականն է պահանջում Գեղամ Մանուկյանը, չունի խղճի զգացողություն, նա նույնիսկ հաճույք կստանա, եթե Գեղամ Մանուկյանը հյուծվի եւ հասնի մահվան դուռը: Իրավապաշտպանը հիշեցրեց Մհեր Եղիազարյանի մահը, ասաց` վստահ էր, որ վարչապետը գիտեր նրա հյուծված լինելու մասին, բայց որոշեց ոչ մի քայլ չձեռնարկել.«Նիկոլ Փաշինյանը մի դաժան մարդ է, որի համար մարդկային կյանքը զրո է»:
Գոհար ՀԱԿՈԲՅԱՆ
