Հայրենիքի փրկության շարժման անդամները կառավարության շենքի դիմաց են: Նրանք ցանկանում են տապալել կառավարության նիստը:
Շարժման ներկայացուցիչ, ՀՅԴ անդամ Գեղամ Մանուկյանը լրագրողների հետ զրույցում ասաց, որ ոստիկանները շրջափակել են կառավարության շենքը. «Եթե գաղտագողի էլ մտել են, ապա դուրս գալու հնարավորություն չեն ունենա: Նշանակում է՝ մի կառավարություն, որը չի կարող բաց երեսով իր վարչապետի հետ մուտք գործել կառավարություն, դադարում է ժողովրդի կառավարություն լինել»:
Նա կարծում է, որ Հայաստանի Հանրապետությունում մի այնպիսի իրավիճակ է ստեղծվել, որ պետական կառավարման համակարգը և օրենքները դադարում են գոյություն ունենալ. «Անցած հինգշաբթի՝ կառավարության նիստում, կառավարությունը չվավերացրեց Տնտեսագիտական համալսարանի ռեկտորի ընտրությունը: Բայց արձանագրենք մի բան՝ հայ ժողովրդի համար նա չունի պրոֆեսիոնալ կառավարություն, նա չունի ունակ կառավարություն: Նայեք կառավարության կայքը: Երեկ վավերացրել է Տնտեսագիտական համալսարանի ռեկտորի ընտրությունը»:
Կարդացեք նաև
Գեղամ Մանուկյանը համարում է, որ նման կառավարությունից ամեն ինչ հնարավոր է սպասել. «Ժողովուրդը կարող է սպասել, որ կառավարությունը վավերացրել է այս, այն, դիվանագիտական կապեր է հաստատել Ադրբեջանի հետ, ճանաչել է Ադրբեջանի տարածքային ամբողջականությունը: Ամեն ինչ սպասելի է այս կառավարությունից»:
Ամի ՉԻՉԱԿՅԱՆ
