Մարդու իրավունքների եվրոպական դատարանի (ՄԻԵԴ) նախագահ Ռոբերտ Սպանոյի ասուլիսի ընթացքում Ստրասբուրգում դատարանի նախագահը հրաժարվեց հասցեական պատասխանել Ադրբեջանի կողմից ՄԻԵԴ վճիռները չկատարելու մասին հարցին:
Ռոբերտ Սպանոյին լրագրողները հիշեցրին՝ Ադրբեջանը Հայաստանի և Արցախի դեմ սանձազերծված պատերազմից հետո մի շարք հայ ռազմագերիների պահում է, հրաժարվում է վերադարձնել, նրանց նկատմամբ կիրառում է վատ վերաբերմունք և հարցին՝ ի՞նչ եք կարծում՝ այս հարցով պետք չէ՞, որ ՄԻԵԴ-ը միջանկյալ միջոց կիրառի Ադրբեջանի նկատմամբ: Նաև փաստեցին՝ ՄԻԵԴ վճիռների չկատարման պատճառով Ադրբեջանն արժանացել է Նախարարների կոմիտեի պատասխանատվությանը: ՄԻԵԴ նախագահը հրաժարվեց հասցեական պատասխանից: Նա հիշեցրեց՝ պատերազմի օրերին՝ սեպտեմբերի 29-ին, դատարանը միջանկյալ միջոց է կիրառել Ադրբեջանի նկատմամբ, այժմ էլ դատարանի քննության ներքո են մի շարք հայ ռազմագերիների հարցով գործերը:
Ադրբեջանի՝ ՄԻԵԴ վճիռները չկատարելու մասին հարցին ի պատասխան, Ռոբերտ Սպանոն ասաց. «Դատարանի վճիռների չկատարման հարցը Նախարարների կոմիտեի պատասխանատվության տիրույթում է: Որպես Եվրոպական դատարանի նախագահ, իմ գործառույթը չէ հետևել վճիռների կատարման գործընթացին, նորից եմ կրկնում, դա Նախարարների կոմիտեի պատասխանատվության տիրույթում է»:
Կարդացեք նաև
Տաթև ՀԱՐՈՒԹՅՈՒՆՅԱՆ
