Այսօր ՊԵԿ մաքսային վիճակագրության եւ եկամուտների հաշվառման վարչության պետ Մնացական Շարաֆյանը «Արմենպրես»-ի մամուլի սրահում հրավիրված ասուլիսում ասաց, որ ավտոմեքենաների ներկրումը 2020-ին՝ 2019 թվականի համեմատ, մոտ 26 անգամ նվազել է: Նրա խոսքով, դեռ բավականին շատ ավտոմեքենաներ են ներմուծվում ՀՀ եւ մաքսային ձեւակերպում ստանում:
2020 թ-ին, պարոն Շարաֆյանի տվյալներով, ներկրված ավտոմեքենաների թիվը կազմել է 7300: Դրանք հիմնականում ներմուծվել են ԱՄՆ-ից:
«Իսկ 2019 թվականին ներմուծվել եւ ՀՀ-ում մաքսային ձեւակերպում է ստացել աննախադեպ թվով՝ 189 000 մեքենա»,-նշեց ՊԵԿ մաքսային վիճակագրության եւ եկամուտների հաշվառման վարչության պետը:
Նրա խոսքով, 2019 թվականի դեկտեմբերին ներմուծողների համար ստեղծել են նոր հարթակ. «Դա նախնական հայտարարագրումն էր, 2020 թվականի հունվարին նրանց թույլ տրվեց նախկին սակագներով իրականացնել մաքսային ձեւակերպումը, իսկ փետրվարից սկսած՝ նման դեպքերը եզակի են եղել»:
Պարոն Շարաֆյանը նաեւ հայտնեց, որ 2020թ-ին, չնայած համավարակով պայմանավորված փակ սահմաններին եւ արտահանման ցուցանիշների նվազմանը, Հայաստանում ավելացել է ապրանք արտահանողների թիվը. «Արտահանողների թվաքանակը միանշանակ ավելացել է, իսկ ներմուծողների թվաքանակում կտրուկ անկում չի եղել, այսինքն՝ պահպանվել է»: ՊԵԿ պաշտոնյանի խոսքով, արտահանված ապրանքները բազմազան են՝ սկսած տրիկոտաժից մինչեւ հանքարդյունաբերական արտադրանք:
Կարդացեք նաև
Լուսինե ԲՈՒԴԱՂՅԱՆ
