Ազգային ժողովի «Իմ քայլը» խմբակցության պատգամավորները ևս Հանրապետության հրապարակում են։
Պատգամավոր Արթուր Հովհաննիսյանը Aravot.am-ի հետ զրույցում, անդրադառնալով Գլխավոր շտաբի հայտարարությանը, ասաց․ «Գլխավոր շտաբի տարածած հայտարարությունը ռազմական հեղաշրջման փորձ է։ Եվ իշխանությունը Հայաստանում պատկանում է ժողովրդին։ Մենք այստեղ ենք հենց հիմա թույլ չտալու ռազմական հեղաշրջման փորձ կատարվի՝ զավթելու ժողովրդի իշխանությունը»։
Նա նշեց, որ ոստիկանությունը և ուժային կառույցները ենթարկվում են գործող իշխանությանը․ «Իրավիճակը կառավարելի է, մենք այս երկրում թշնամիներ չունենք։ Ամեն ինչ պետք է անենք, որ խուսափենք բոլոր բախումներից, հնարավոր սադրանքներից։ Մեր բոլորի այսօրվա անելիքը համերաշխության մթնոլորտ ձևավորելն է և Հայաստանի Հանրապետության թե՛ ներքին և թե՛ արտաքին անվտանգության ռիսկեր չառաջացնելն է»։
Իսկ ինչ վերաբերվում է կուսակցություններին, որոնք ևս հայտարարություններ են տարածել՝ պահանջելով վարչապետ Նիկոլ Փաշինյանի հրաժարականը, Արթուր Հովհաննիսյանը համարում է, որ նրանք այդ պահանջը ունեցել են հեղափոխության հաջորդ օրվանից։
Կարդացեք նաև
Կուսակցությունները նաև մտահոգություն էին հայտնել, որ կարող է քաղաքացիական պատերազմ տեղի ունենա և Մարտի 1-ի իրադարձությունները կրկնվեն․ «Չկա նման բան։ Մեր իշխանությունը ամեն ինչ անելու է, որպեսզի թույլ չտա որևէ բախում։ Էլ չեմ խոսում ձեր մատնանշած իրավիճակների մասին»։
Ամի ՉԻՉԱԿՅԱՆ
