Այսօր ԱԺ-կառավարություն հարցուպատասխանի օր է ու վաղ առավոտից Ազգային ժողովի շենքի տարածքում տագնապ է: Դեմիրճյան փողոցում՝ ԱԺ մուտքի մոտ բավականին մեծ թվով ոստիկաններ մինչեւ ատամները զինվում են ու պատրաստվում ինչ-որ գործողության:
Ժամը 16-ին ընդդիմության հանրահավաքն է ու ոստիկանությունը կասկածներ ունի, որ սադրանքներ կլինեն: Ամեն դեպքում ԱԺ այգում այս պահին ամեն ծառի, ամեն թփի տակ մի զինված մարդ է կանգնած, պատուհաններից երեւում են դիպուկահարներ: ԱԺ շենքի հետնամասի այգում մի քանի ավտոբուսով ոստիկաններ են տեղակայվել՝ վահաններով ու զենքերով:
Կարդացեք նաև
Այս պատրաստությունները այնպիսի տագնապ են առաջացրել ԱԺ շենքում, որ բավական է լրագրողները մոտենան պատուհանին՝ ինչ-որ բան նկարելու՝ անմիջապես անվտանգության աշխատողները գալիս են թիկունքից ու զննող հայացքով նայում, հարցաքննում:
Անգամ, երբ նիստերի դահլիճում փոխում են պատգամավորների սեղանների վրա դրված ջուրը, դրա մեջ էլ են ռումբ փնտրում ու կասկածամտորեն նայում:
Հռիփսիմե ՋԵԲԵՋՅԱՆ
