Թուրքիայից, Իրանից լոլիկ, պղպեղ է ներմուծվում Հայաստան, իսկ մեր ջերմոցատերերը բողոքում են՝ գազը թանկ է, հավասար մրցակցային պայմաններում չեն: Այսօր էկոնոմիկայի փոխնախարար Վարոս Սիմոնյանին ԱԺ տարածաշրջանային եւ եվրասիական ինտեգրման հանձնաժողովի նիստում այս հարցն ուղղեց «Լուսավոր Հայաստանի» պատգամավոր Էդվարդ Անդրեասյանը:
Վարոս Սիմոնյան
Փոխնախարարը վստահեցրեց, որ Թուրքիայից որեւէ գյուղատնտեսական արտադրանք չի ներմուծվում Հայաստան հունվարի 1-ից սկսած, Իրանից ներմուծվել է: Նա ասաց, որ իրոք ձմեռը սաստիկ է եղել ու ծախսեր են առաջացել մեր գյուղատնտեսների համար. «Այն ապրանքատեսակները, որոնք ներմուծվում են Իրանից, մեր ՊԵԿ գործընկերները հաշվարկներ են անում ու մաքսազերծումն այն գների հիման վրա է իրականացնում, որ մեր տեղական արտադրությունը չի տուժում, ավելի շատ շահեկան վիճակում է գտնվում: Այո, ապրանքի գինը թանկացել է, բայց ներմուծվող ապրանքների մաքսը բարձր է: Մենք պաշտպանում ենք տեղական արտադրողին: Մաքսիմում 20-30 օր կարող է նման պրոցես լինի, թանկ ապրանքը վերջին ամիսներին ստացված ապրանք է, չկա այլեւս գազի ծախս, գնային առումով ավելի մրցունակ կլինի հիմա ու ավելի գրավիչ»:
Անդրեասյանը կասկած հայտնեց, որ Թուրքիայից գյուղատնտեսական ապրանք չի գալիս, ասաց՝ Արմավիրի մարզում մարդիկ ասում են՝ լոլիկ գալիս է: Փոխնախարարը պատասխանեց, որ երբ 2020-ի հոկտեմբերի 20-ին որոշում է ընդունվել, 2350 ապրանքատեսակի մուտք ավտոմատ փակվել է, այն պարագայում, երբ ՀՀ ներմուծվում էր մոտ 2900 ապրանքատեսակ: Փետրվարին որոշ կոդեր են ավելացել, որովհետեւ անցումային ժամանակաշրջանը, որը տրված էր տնտեսվարողներին, որ այլընտրանքային շուկաներից բերեն, չէին կարողացել, լոգիստիկ ծախսեր էին եղել. «Սահմանվել են նոր ռեժիմներ, ավելացվել է ցանկը»: Մասնավորապես, նա նշեց, որ բացառություն են արել հայտնի բրենդային ընկերությունների համար, որոնց գլխամասերը եվրոպական երկրներում են, օրինակ, Max Mara, Tommy Hilfiger եւ այլն: Նրանք իրենց պատվերները տալիս են հաջորդ տարվա համար:
Ինչ վերաբերում է լոլիկին, Վարոս Սիմոնյանն ասաց. «Կոնկրետ արգելափակում դրված է՝ թուրքական ծագում ունեցող: Եթե Վրաստանից գա ու վրան գրված չլինի՝ թուրքական, հանցագործություն է»:
Կարդացեք նաև
Միքայել Մելքումյան
Հանձնաժողովի նախագահ Միքայել Մելքումյանը հորդորեց պարզ ասել՝ հումքի ներմուծումը չի արգելվում ու եթե մեր տոմատի գործարանը այդ լոլիկը փորձի ներմուծել որպես հումք՝ այդտեղ արգելանք չկա, մեր հանրությունը պետք է իմանա սրա մասին. «Մենք արդեն 15 տարի եւ ավելի Թուրքիայի հետ ունենք մոտ 300 մլն դոլարի ներմուծում: Ընդամենը 2-3 մլն դոլարի արտահանել ենք: Ինչ վերաբերում է Վրաստանին, Հայաստանը Վրաստանի հետ ունի Ազատ առեւտրի համաձայնագիր, բերում են թուրքական ապրանքը Վրաստան, փաթեթավորում են եւ ուղարկում»:
Փոխնախարարը պատասխանեց. «Մենք գրել ենք՝ թուրքական ծագում ունեցող ապրանքներ, երբ որ մեր հիմնական գործիքակազմը ծագումով ենք կարգավորում: Կոդերը ապրանքատեսակների դրված է, որ դրանք արգելված են՝ ՀՀ ներմուծելու համար: Հաշվի առնելով, որ նույն ապրանքատեսակները մտնում են նաեւ ԵԱՏՄ, խնդրել ենք ԵԱՏՄ մեր գործընկերներին, որ այդ ցանկով ապրանքատեսակները թույլ չտան, որ մտնի ՀՀ: Հենց ապրանքատեսակը հատեց, ունի իր կոդը, կարմիր լույսի տակ է»:
Հռիփսիմե ՋԵԲԵՋՅԱՆ
