Այսօր վարչապետ Նիկոլ Փաշինյանը ԱԺ-ում ներկայացնում էր կառավարության ծրագրի 2020 թվականի կատարման ընթացքի եւ արդյունքների մասին զեկույցը: Ելույթի ընթացքում բարձր տոնայնությամբ նա հայտարարեց. «Չհուսահատվեք, չվհատվեք, դուխներդ տեղը, գլուխներդ բարձր, Հայաստանում ապագա կա։ Արցախում ապագա կա։ Հայ ժողովուրդն ունի ապագա, եւ մենք միասին կերտելու ենք ազատ, երջանիկ եւ հզոր ապագան»:
Իմքայլական պատգամավորները ոտքի կանգնեցին ու սկսեցին ծափահարել, ինչը քննարկումների տեղիք է տվել:
«Անհասկանալիորեն» ծափ չէր տալիս միայն Մխիթար Հայրապետյանը:
Կարդացեք նաև
Լրագրողները պատգամավորներից հետաքրքրվեցին, թե 5000 զոհերի, հայրենիքի մեծ մասի կորստից հետո ի՞նչ առիթ կար խորհրդարանում հոտընկայս ծափահարելու:
«Ծափահարում էինք, որ դուք հարցնեիք»,- պատասխանեց ԱԺ պաշտպանության եւ անվտանգության հանձնաժողովի նախագահ Անդրանիկ Քոչարյանը:
Արփի Դավոյանն ասաց. «Այդպես էինք ուզում»: Մյուսները չարձագանքեցին:
Ի դեպ, ԱԺ-ում էր նաեւ ՊՆ նախարար Վաղարշակ Հարությունյանը: Լրագրողները գերիների վերադարձի, երկրում ստեղծված այս իրավիճակի, Շիրակի մարզի ճանապարհին ծնողների բողոքի ցույցի մասին հարցեր ուղղեցին նախարարին, նա անհաղորդ մնաց ու չխախտեց լռությունը:
Հռիփսիմե ՋԵԲԵՋՅԱՆ
