«Բոլորին է պարզ, որ Նիկոլ Փաշինյանին իշխանության են բերել ԱՄՆ-ի եւ Մեծ Բրիտանիայի հատուկ ծառայությունները՝ Ղարաբաղը տալու նպատակով»,- այսօր ռուս-հայկական միջազգային «Լազարեւյան ակումբի» չորրորդ հանդիպմանն ասաց Արտաշես Գեղամյանը:
Նա հարց ուղղեց Արցախի նախագահներին՝ Արկադի Ղուկասյանին ու Բակո Սահակյանին, թե՝ չե՞ս կարծում, որ ռազմական գործողությունների ժամանակ Ռոբերտ Քոչարյանին, Սերժ Սարգսյանին, Արկադի Ղուկասյանին, Բակո Սահակյանի անմիջական մասնակցությունը թույլ չտալը խոսում է այն մասին, որ Փաշինյանը կատարում էր պատվերը, որոնց համար եկել էր իշխանության:
Խոսելով Աղդամի շրջանի ականապատման քարտեզները Ադրբեջանին տալու գործարքի մասին՝ Գեղամյանն ասաց, որ դրանով ԱՄՆ-ն է ակտիվանում ու հիշեցրեց, որ չնայած ռուս խաղաղապահները այստեղ են 5 տարով, բայց պայմանագրում գրված է, որ ցանկացած կողմի ցանկությամբ ստորագրությունը կարող են հետ կանչել ու ռուս խաղաղապահների առաքելությունը դադարեցնել:
Արկադի Ղուկասյանը պատասխանեց. «Ես ոչ մի բան չեմ բացառում, բայց ես չեմ ուզում հաստատել, թե ով է բերել այս մարդկանց իշխանության ղեկին, ես փաստեր չունեմ: Բայց կրկնում եմ՝ ոչ մի բան չեմ բացառում: Ինձ առաջին օրից շփոթեցնում էր այն, ինչ տեղի էր ունենում: 30 տարի մենք պատերազմող կողմ ենք եղել, որովհետեւ 30 տարի պատերազմը շարունակվում էր»:
Կարդացեք նաև
Արկադի Ղուկասյանի համար տարօրինակ է եղել, որ 3 տարվա ընթացքում այդքան ԳՇ պետեր, պաշտպանական բանակի հրամանատարներ են փոխել, այն էլ՝ այդ պատերազմական իրավիճակում. «Նախկին իշխանություններին մեղադրելը հեշտ է, բայց նրանք հո ձեր նշանակածներն են: Սկզբում ազատեցին մեր լեգենդար նախկին հրամանատարները բանակի ղեկավարումից, որ չկարողանան ազդեցություն ունենալ: Ու այսօր ՀՀ իշխանությունները մեղադրում են այն գեներալներին, որոնց հենց իրենք են նշանակել այդ պաշտոններում»:
Խոսելով բանակցությունների մասին՝ Արկադի Ղուկասյանն ասաց, որ Հայաստանի իշխանությունները խոսում են բաների մասին, որոնցից բացարձակ ոչինչ չեն հասկանում. «Վերջիվերջո հարցնելը ամոթ չէր, մենք մեր օգնությունն առաջարկել էինք, որովհետեւ չի կարելի փողոցից գալ ու պետություն ղեկավարել, արտաքին քաղաքականությամբ զբաղվել: Եղավ այն, ինչ եղավ, բայց կարելի էր հարցնել՝ ինչ մակարդակում են գտնվում բանակցությունները, մենք ինչից էինք սկսել ու որտեղ էինք հասել: Բանակցային գործընթացը դիլետանտների եւ սիրողական մակարդակով զբաղվելու գործ չէ, այստեղ շատ նրբություններ կան: Վտանգավոր է»:
Հռիփսիմե ՋԵԲԵՋՅԱՆ
