ՀՀ ԱԺ «Պատիվ ունեմ» դաշինքի պատգամավոր Թագուհի Թովմասյանը ՀՀ վարչապետ Նիկոլ Փաշինյանին ՀՀ ԱԺ-ում հարցրեց՝ ՀՀ Գեղարքունիքի մարզի մի շարք համայնքների ջրամատակարարման հարցը ի՞նչ պետք է լինի, քանի որ ադրբեջանցիները նրանց ջրամաբարի տարածքում են, և ի՞նչ է լինելու Կութ համայնքի բնակիչների փոխհատուցման հարցը, քանի որ նրանց 80 գլուխ անասունը ադրբեջանցիները հափշտակել են: Նիկոլ Փաշինյանը, չպատասխանելով հարցին, բերեց Այգեպար համայնքի օրինակը, նշելով, որ այդտեղ ճանապարհ են ասֆալտապատել:
Խոսելով անվտանգային խնդիրներին առնչվող հարցի մասին՝ նա ասաց. «Էն երկիրը, որ փաստացի պատերազմի տրամաբանության մեջ է, չի կարող խոսել քաղաքացիների կյանքի իրավունքի պաշտպանության մասին: Սա է պատճառը, որ ասում եմ՝ պետք է գնալ խաղաղության օրակարգով»:
Թագուհի Թովմասյանն արձանագրեց, որ քաղաքացիների անվտանգության, կյանքի իրավունքի պաշտպանության հարցում դեռևս որեւէ շոշափելի քայլեր տեսնել չենք կարող: Այնուհետեւ, հիշեցնելով, որ Նիկոլ Փաշինյանն էլ է եղել լրագրող, բարձրացրեց ՀՀ ԱԺ նիստերը լուսաբանող լրագրողների մտահոգությունները, որ երբեք նման սահմանափակումներ չեն եղել, որ լրագրողները չկարողանան անգամ իշխանական խմբակցության մոտով անցնել ու հարցրեց՝ ի՞նչ է մտածում կառավարությունը:
Կառավարության ղեկավարը պատասխանեց. «Կառավարության ծրագրում լրագրողական էթիկայի կարգավորումների հետ կապված ունենք առաջարկ. պետք է օրենսդրական փոփոխություններ առաջարկել, որոնք սահմանում են ինստիտուտ, երբ լրագրողներն իրենք իրենց գործունեության էթիկայի որոշակի կարգավորումներ կմտցնեն: Կան նաև աննախադեպ շատ իրավիճակներ. այսօր էլ ԱԺ-ում աննախադեպ իրավիճակ ունենք, երբ կառավարությունը պարտավոր է անդրադառնալ աննախադեպ քայլերով: ՀՀ քաղաքացիներն իրավունք ունեն իմանալ լրատվամիջոցների իրական շահառուներին: Թույլ չեմ տալու, որ ժողովրդավարությունը դառնա ամենաթողության համար պատշաճ հարթակ, և բոլոր միջոցները ձեռնարկելու եմ ոչ թե որևէ մեկի ճաշակին համապատասխան, այլ ՀՀ քաղաքացիներից ստացած մանդատների շրջանակներում: Իսկ սահմանապահ համայնքների հետ կապված՝ Ձեր դիտարկումը ընդունում եմ ի գիտություն»:
Կարդացեք նաև
Տաթև ՀԱՐՈՒԹՅՈՒՆՅԱՆ
