Ինչպես տեղյակ եք, որ սեպտեմբերի 10-ին ՌԱՏԿՈ ՍՊԸ-ն սկսեց տապալել Ալիխանյան 6/1 հասցեում տեղակայված ծառերն ու փորման աշխատանքներ իրականացնել ցանկապատված հողատարածքի հենց այն հատվածում, որտեղ, ըստ իրենց պնդման, գտնվում էր նկուղը, ինչի հիմքով տրվել էր հողի սեփականաշնորհում:
Մենք բազմիցս հայտարարել ենք, որ այդ հատվածում որևէ նկուղ չկա ու չի եղել, ինչի վերաբերյալ նաև քրեական գործ է հարուցվել` ուսումնասիրելու 2004թ. հանրային հողի զավթման ապօրինի գործընթացը:
Ուրբաթ օրը քննիչի և ոստիկանների միջամտությամբ կասեցվեցին փորման աշխատանքները, իսկ ՀՀ Քննչական կոմիտեի Երևան քաղաքի Աջափնյակ և Դավթաշեն վարչական շրջանների քննչական բաժնի պետի պաշտոնակատար, արդարադատության երրորդ դասի խորհրդական Ռ. Մախմուդյանի կողմից Երևանի քաղաքապետարան է ուղարկվել շինաշխատանքները կասեցնելու որոշման վերաբերյալ միջնորդություն:
Համաձայն գրության` նախաքննության անհրաժեշտությամբ պայմանավորված քրեական գործի համար ապացուցողական նշանակություն ունեցող փաստերի ոչնչացումը կանխելու նպատակով անհրաժեշտ է հանձնարարել համապատասխան ստորաբաժանման աշխատակիցներին որոշում կայացնել «Ռատկո» ՍՊ ընկերության կողմից Երևան քաղաքի Ալիխանյան եղբայրներ փողոցին հարող տարածքում իրականացվող բազմաբնակարան շենքի շինարարությունը, մինչև հանգամանքների պարզումը, կասեցնելու վերաբերյալ և արդյունքների մասին հայտնել վարույթն իրականացնող մարմին:
Կարդացեք նաև
Սակայն, այսօր առավոտից «Ռատկո» ՍՊԸ-ն մեծ թափով վերսկսեց քանդման աշխատանքները` երկու մեքենայով գետնին հավասարեցնելով ծառերն ու քանդելով քրեական գործի համար հիմք հանդիսացող հողատարածքը: Քանդման տեսագրություններից ակնհայտ է դառնում, որ տվյալ հատվածում որևէ նկուղ գոյություն չունի, դուրս է բերվում բացառապես հողային շերտ` առանց որևէ կառույցի հետքի:
Երևանի քաղաքապետարանից պատճառաբանում են, թե իրենց չի հասել գրությունը, մինչդեռ այն, ըստ մեր տեղեկությունների, ուղարկվել է էլ. փոստի հասցեով, և պետք է անմիջապես հասներ հասցեատիրոջը: Անկախ դրանից, քաղաքապետարանի ներկայացուցիչներն արդեն մի քանի ժամ է, ինչ ծանոթացել են միջնորդության պատճենին և տեղյակ են դրա մասին:
Սիրելի’ լրագրողներ, խնդրում ենք ԱՅՍՕՐ հնարավորինս հետևողականորեն խոսել քաղաքապետարանի պատասխանատու մարմինների հետ` հասկանալու համար, թե ինչու է քաղաքապետը զանց առնում քննչականի դիմումն ու չի ընդունում ապօրինի շինաշխատանքները կասեցնելու որոշում:
Իր հանցավոր անգործությամբ քաղաքապետարանը հնարավորություն է տալիս «Ռատկո» ՍՊԸ-ին ավարտին հասցնել ողջ հողակտորի փորման աշխատանքներն ու քանդել քրգործի համար հիմք հանդիսացող տարածքը: Այսպիսի գործելաոճը ստիպում է տեսնել հանցակցության տարրեր:
Ֆիզիկայի ինստիտուտի գիտավանի բնակիչներ
