«Նիկոլ Փաշինյանի օգնական Նաիրի Սարգսյանը հայտարարել էր, թե զոհվածների 16 ծնողներ գնացել են իրենց մոտ, որոնց ներկայացրել են գունագեղ կոչվող միջոցառման փոփոխված ծրագիրը եւ այդ ծնողները տվել են իրենց հավանությունը; Բայց ինձ զանգահարել է այդ հանդիպմանը մասնակցած երկու ծնող եւ տեղեկացրել, որ նման բան չի եղել, որ, իրոք, հանդիպել են, իրենց ներկայացրել են ծրագիրը եւ վերջ, որ իրենք հավանություն չեն տվել: Նրանք չեն ասել, թե նորմալ է, կարելի է միջոցառումն անել: Այնպես որ, դա սուտ է: Ես էլ նրանց խնդրել եմ, որ այսօր գան կառավարության շենքի առջեւ եւ հրապարակային հայտարարեն, որ Նաիրին ստել է»,-այսօր Հանրապետության հրապարակում Aravot.am-ին ասաց «Հույսի ճրագ» իրավապաշտպան ՀԿ հիմնադիր նախագահ, զոհվածի եղբայր եւ անհետ կորածի հորեղբայր Արսեն Ղուկասյանը:
Մեր հարցին, թե այսօրվա բողոքի ցույցի ընթացքում ինչ են նախատեսում անել զոհված տղաների ծնողները, պարոն Ղուկասյանը պատասխանեց. «Մնալու ենք այստեղ, պետք լինի, երեք օրն էլ կմնանք, որ այս միջոցառումը չեղարկվի: Վերջապես, պետությունը պետք է հասկանա, որ այս համերգը այս պահին անթույլատրելի է, չի կարելի: Ուղղակի պետք է հարգել մարդկանց: Մենք հասարակ հարգանք ենք պահանջում մեր երեխաների, մեր զոհվածների հիշատակի համար: Պահանջում ենք, որ այս համերգը տեղափոխվի, ասենք, նոյեմբերի 10-ից հետո: Դժվար բան չենք ասում: Եթե Տոկիոյի օլիմպիական խաղերը հնարավոր է մեկ տարի հետաձգել, եթե անցած տարի ապրիլի 24 թույլ չտվեցին: Ստացվում է, որ Հայոց Մեծ Եղեռնի օրը կարող են տեղափոխել, իսկ այս համերգը ո՞չ: Թող չասեն, թե անկախության 30-ամյակն է:
Կամ, այս գումարների վատնումը, երբ այսօր լիքը վիրավոր, հաշմանդամություն ձեռք բերած զինվորներ կան: Թող այդ գումարները տղաների բուժմանը տրամադրեն, այլ ոչ թե ակրոբատները այսօր ճոպանների վրա ինչ-որ անհասկանալի շարժումներ ու պտույտներ կատարեն»,-պատասխանեց նա:
Կարդացեք նաև
Աշոտ ՀԱԿՈԲՅԱՆ
