«Հնարավոր չի, որ ՀՀ սահմանների պահպանության վերաբերյալ տրվի չկրակելու կամ սահմանը չպաշտպանելու հրաման։ Դա կլինի պետական դավաճանություն»,- ԱԺ-կառավարություն հարցուպատասխանի ժամանակ այսօր մեկնաբանելով տեղեկությունները, թե հայ-ադրբեջանական շփման գծում հայկական կողմին հրահանգված է չկրակել՝ ասաց վարչապետ Նիկոլ Փաշինյանը։
Նա կոչ արեց նման լուրեր չտարածել եւ այդ հարցում իշխանություն-ընդդիմություն չտարանջատել․ «Ի՞նչ է նշանակում՝ չկրակելու հրաման կա։ Նման բան չի կարող լինել։ Նախ, չկրակելու հրաման տվողը գործում է պետական դավաճանություն՝ ՀՀ տարածքը պաշտպանելու գործում»։
Հարցադրումն արած «Պատիվ ունեմ» խմբակցության պատգամավոր Տիգրան Աբրահամյանը նաեւ հետաքրքրվեց՝ ի՞նչ տեղեկություններ կան երեկ ՀՀ տարածք ադրբեջանական ԶՈՒ-ի ներխուժման հետեւանքով գերեվարված հայ զինվորներից։ Հիշեցնենք, որ ըստ ՊՆ-ի՝ տասներեք հայ զինվոր է գերեվարվել։
Նիկոլ Փաշինյանը նշեց․ «Ժամանակն է, որ գերեվարման ամեն դեպքը պատշաճ հետաքննենք, որովհետեւ ամեն ծառայող ունի պարտականություններ եւ պետք է բոլոր դեպքերով հստակ․․․գուցե սխալ ենք վարվել զգացմունքային ֆոնի վրա։ Պետք է քննվի, թե ինչ է նշանակում գերի ընկնել, ի՞նչ հանգամանքներում։ Զինվորական կանոնագրերը սահմանում են, թե որ դեպքում գերի ընկնելը չի համարվում հանցագործություն։ Ամեն դեպքում պետք է քննենք՝ այդ դեպքի հետ գործ ունե՞նք, թե ոչ։ Եթե մարդը վիրավոր կամ անգիտակից վիճակում է գերեվարվում, ապա ոչ մի «պրետենզիա» չի կարող լինել»։
Կարդացեք նաև
Լուիզա ՍՈՒՔԻԱՍՅԱՆ
