«Երեկ երեկոյան հանդիպում ենք ունեցել Եվրամիության պատվիրակության հետ, մանրամասն քննարկել ՀՀ անվտանգային հարցերը, ներքաղաքական իրավիճակը»,-խորհրդարանում լրագրողներին այսօր հայտնեց «Հայաստան» դաշինքի պատգամավոր Իշխան Սաղաթելյանը։
«Ուղիղ եւ հստակ ասել ենք ժողովրդավարական հետընթացի մասին։ Տպավորություն ունեմ, որ միջազգային կառույցներին իշխանությունը մոլորեցնում է եւ սխալ տեղեկատվություն տալիս իրական գործընթացների մասին։ Նույնը եւ իրենց տիրապետության տակ գտնվող քաղհասարակությունը»,-նշեց Իշխան Սաղաթելյանը։
Նրա խոսքով՝ կոնկրետ դեպքերով են իրավիճակը նկարագրել եվրոպացի գործընկերների համար․ «Մենք կարեւորում ենք ժողովրդավարական գործընթացները, բայց այսօր կատարվողը կապ չունի դրանց հետ։ Իշխանությունը գնում է բռնապետության ճանապարհով։ Մեր պարտքն է սա ներկայացնել»։
Կարդացեք նաև
Ինչ վերաբերում է ՌԴ-ի կողմից Դոնեցկի եւ Լուգանսկի ճանաչման համատեքստում ՀՀ իշխանության անելիքներին, Իշխան Սաղաթելյանը կարծիք հայտնեց, որ Արցախի ճանաչումն իշխանության օրակարգից դուրս է մղված։
Լուիզա ՍՈՒՔԻԱՍՅԱՆ
