«Հայելի» ակումբում անդրադառնալով Արցախի տարածքային անվտանգությանն ու արցախցիների օրհասական վիճակին՝ ռազմական փորձագետ Դավիթ Ջամալյանն ասաց. «Տեղի է ունենում կանխատեսելի գործընթաց: Օրվա իշխանությունը Արցախը հանձնում է: Կասկած անգամ չունեմ, որ պատրաստ է լինելու հանձնել նաեւ Սյունիքը: Եվ այդ ամենը քողարկված է լինելու հայրենասիրական կոչերով ու ելույթներով:
Հռետորական մի հարց եմ ուզում տալ, որպեսզի մեր հասարակությունը կարողանա ինքնուրույն հետեւություն անել: Գործող իշխանությունը, Նիկոլ Փաշինյանը սկզբունքորեն չեն թաքցնում, որ նոր պատերազմի վտանգը մեծ է, որ Ադրբեջանը պատրաստվում է հարված հասցնել: Իրենք ընդունում են, որ առկա է պատերազմի վտանգ: Ինչպիսի՞ն պետք է լինի պետականակենտրոն, ադեկվատ, նորմալ իշխանության ռեակցիան ակտուալ արտաքին վտանգի հանդեպ: Այսինքն, ի՞նչ պետք է անի պատասխանատու իշխանությունը: Պետք է երկիրը արագ պատրաստի պաշտպանության, իհարկե, նաեւ դիվանագիտական ողջ ռեսուրսը օգտագործելով պատերազմը կանխելու համար:
Ցանկացած դիվանագիտություն արդյունավետ է, եթե ինքդ քեզնից ինչ-որ բան ես ներկայացնում, եթե ուժեղ ես, կարող ես ուժ հակադրել ագրեսորին: Գործող իշխանությունը ընդունում է, որ կա պատերազմի վտանգ, բայց ՀՀ զինված ուժերը չունեն գլխավոր շտաբի պետ: Կա պաշտոնակատար:
Անձերը դնում եմ մի կողմ եւ հետեւյալ հարցադրումն եմ անում. ակտուալ արտաքին վտանգի պայմաններում հնարավո՞ր է կազմակերպել արդյունավետ պաշտպանություն, երբ ԳՇ-ն չունի ղեկավար: Հատկապես ճգնաժամային իրավիճակում պաշտոնակատար լինելու հանգամանքը անպայման ազդելու է կառավարման արդյունավետության վրա: Ես հիմնավոր կասկած ունեմ առ այն, որ սա արվել է միտումնավոր, որպեսզի հնարավոր լայնամասշտաբ ռազմագործողությունների պարագայում ի թիվս այլ գործոնների, ի հայտ գա նաեւ կառավարման ճգնաժամ, ինչը Ադրբեջանի համար ավելի դյուրին, հեշտ կդարձնի տարածքներ զավթելը: Թիրախում Սյունիքն է: Իսկ հետագայում Նիկոլ Փաշինյանը մեղքը կբարդի բանակի վրա եւ ճգնաժամի, աղետի ֆոնին ավելի հեշտ կստորագրի այն ամենը, ինչ դժվար է ստորագրել անգամ այսօրվա վիրավոր Հայաստանի համար»:
Կարդացեք նաև
Աշոտ ՀԱԿՈԲՅԱՆ