Աշխատանքի եւ սոցիալական հարցերի փոխնախարար Դավիթ Խաչատրյանն այսօր ԱԺ աշխատանքի եւ սոցիալական հարցերի հանձնաժողովի նիստում քննարկման ներկայացրեց «Պետական կենսաթոշակների» եւ «Պետական նպաստների մասին» օրենքներում լրացումներ եւ փոփոխություններ կատարելու նախագծի փաթեթը: Գործող օրենքներով, եթե մարդը զինծառայողների կյանքին կամ առողջությանը պատճառված վնասի հատուցման Զինծառայողների հատուցման հիմնադրամից ստանում է հատուցում, չի կարող զինծառայողի կենսաթոշակ ստանալ: Նման կարգավորում կա նաեւ «Զինվորական ծառայության եւ զինծառայողի կարգավիճակի մասին» օրենքով պարգեւավճարների համար: Այս դեպքում մարդը չի կարող զինհաշմանդամության թոշակ ստանալ. «Զոհված զինծառայողի ընտանիքի անդամը, որը հիմնադրամից հատուցում է ստանում, չի կարող ստանալ կերակրողին կորցնելու դեպքում զինվորական կենսաթոշակ, սակայն կարող է ստանալ աշխատանքային կենսաթոշակ կամ նպաստ:
Առաջարկվում է սահմանել հավասար պայմաններ ինչպես զինվորական թոշակ, այնպես էլ աշխատանքային թոշակ ստանալու համար:
Դավիթ Խաչատրյան
Ըստ կառավարության ներկայացուցչի, խնդիրը պետք է այնպես կարգավորել, որ անձը կարողանա հիմնադրամից ստանալ հատուցում եւ միաժամանակ տարիքային, երկարամյա ծառայության, մասնակի, արտոնյալ աշխատանքային կենսաթոշակներ, երկարամյա ծառայության զինվորական կենսաթոշակ, ծերության նպաստ: Իսկ կերակրողին կորցնելու դեպքում կենսաթոշակի կամ նպաստի իրավունք անձը կունենա, եթե այդ կենսաթոշակը կամ նպաստը չի նշանակվում մարտական գործողությունների հետեւանքով զոհված զինծառայողի գծով:
Թադեւոս Ավետիսյան
«Հայաստան» խմբակցության պատգամավոր Թադեւոս Ավետիսյանը հարցրեց՝ եթե անձը գնացել է հայրենիքը պաշտպանելու ու ստացել է հաշմանդամություն ու հիմնադրամից հատուցում, եթե այս օրենքը ընդունվի, իրեն չե՞ք տալու աշխատանքային կենսաթոշակ: Դավիթ Խաչատրյանը պատասխանեց, որ եթե հաշմանդամությունը ժամկետով է, հիմնադրամից կստանա այնքան ժամանակ, մինչեւ ժամկետը կլրանա, որն առավելագույնը 20 տարի է:
Կարդացեք նաև
Թադեւոս Ավետիսյանը զարմացած էր, թե ինչու է այս հարցը կառավարության նիստում որպես «չզեկուցվող» գնահատվել: Բացի այդ, նա ընդգծեց, որ հիմնադրամի միջոցները աշխատավարձից մասհանումներով են գոյանում, բյուջեով չի, փոխհատուցման նպատակն էլ է տարբեր. «Երբ մարդը աշխատել է, ձեռք է բերել այդ թոշակի իրավունքը, նա սոցվճարներ է վճարել, ստաժ է առաջացել, գոյություն ունի կենսաթոշակային բաշխողական համակարգը, որով գոյացել է իր կենսաթոշակը: Հիմա այդ մարդը նաեւ հայրենիքն է պաշտպանել, ստացել վիրավորում, կամ Աստված չանի, իր կյանքն է կորցրել ու իր երեխաները պետք է ստանան կերակրողին կորցնելու նպաստ, դուք ասում եք՝ գիտեք, այս մեկը որ տալիս ենք, եկեք այս մեկը չտանք: Ի՞նչ կապ ունի պետությունը հիմնադրամի հետ: Մեկը իրավունքի համար կենսաթոշակ է, մյուսը՝ վարքագծի համար հատուցում: Ո՞ւմ մտքով են անցել այս լուծումները»:
Փոխնախարարը պատասխանեց, որ եթե իրենք են բերել նախագիծը, ուրեմն իրենց մտքով է անցել:
Թադեւոս Ավետիսյանն առաջարկեց հակառակ լուծումը տալ՝ ոչ թե մարդուն զրկել աշխատանքային թոշակից, այլ այդ երկու վճարումները չկապել իրար հետ. «Մարդը իր արյամբ վաստակել է հատուցումը հիմնադրամից, իսկ թոշակ ստանալու իրավունքն էլ ձեռք է բերել՝ աշխատելով:
Առաջարկի մասին հանձնաժողովականներն ասացին, որ աշխատանքային քննարկում կանեն, դիրքորոշում կհայտնեն: Նախագիծը նախնական տեսքով դրվեց քվեարկության եւ դրական եզրակացություն ստացավ:
Հռիփսիմե ՋԵԲԵՋՅԱՆ
