Վերաքննիչ քրեական դատարանը 12.04.2022թ-ին որոշում է կայացրել Գևորգ Գևորգյանի պաշտպանի վերաքննիչ բողոքը մերժելու մասին: Ըստ տուժողների իրավահաջորդի ներկայացուցիչ Լիպարիտ Սիմոնյանի (լուսանկարում)՝ «Վերաքննիչն անփոփոխ է թողնել Սյունիքի մարզի առաջին ատյանի դատարանի՝ Գևորգ Գևորգյանին կալանքն անփոփոխ թողնելու մասին որոշումը»:
Սյունիքի մարզի դատարանը ապրիլի 12-ի որոշմամբ բավարարել է տուժող կողմի միջնորդությունը՝ գործի տարածքային ընդդատությունը փոփոխելու մասին, և գործի քննությունը կիրականացվի Երևան քաղաքի ընդհանուր իրավասության դատարանում: Նշված միջնորդությանը միացել է նաև ամբաստանյալն ու պաշտպանը, ինչպես նաև մեղադրողը:
Հիշեցնենք, որ ՊԲ հրետանային դիվիզիոնի շտաբի պետ-հրամանատարի տեղակալ, կոչումով մայոր Գեւորգ Գեւորգյանը մեղադրվում է հանրորեն վտանգավոր արարքի կատարման համար: Նա, ըստ մեղադրանքի, 2020թ. հոկտեմբերի 12-ին, ժամը 6-ի սահմաններում (Վարանդայի) Ֆիզուլիի շրջանում գտնվող «Զովառլու» կոչվող տեղամասում մարտական գործողություններին մասնակցելու ընթացքում ԳԱԶ մակնիշի զինմեքենայով փախուստի է դիմել կրակային դիրքից, առանց ղեկավարման մնացած մարտկոցի անձնակազմը խուճապի է մատնվել՝ փորձելով հնարավոր միջոցներով պաշտպանվել: Ըստ այս որոշման, Գեւորգյանի նման գործողությունները հասցրել են ծանր վնաս, զոհվել են մարտկոցի քսան պահեստազորայիններ, զինծառայողներ:
Ռուզան ՄԻՆԱՍՅԱՆ
