Այսօր Ֆրանսիայի հրապարակից մեկնարկած երթն անցնելով մայրաքաղաքի փողոցներով, հասավ ՀՀ արտաքին գործերի նախարարության շենքին, որտեղ նրանց սպասում էին պատ կազմած ոստիկանները: «Դիմադրության» շարժման առաջնորդներից Իշխան Սաղաթելյանը հայտարարեց, որ ԱԳՆ չի առաջնորդվում Հայաստանի ժողովրդի շահերով, ուստի պետք է շրջափակել շենքի մուտքերը, որից հետո երթի մասնակիցները ճեղքելով ոստիկանական պատը մոտեցան ԱԳՆ-ի շենքի մուտքին եւ սկսեցին վանկարկել՝ «Նիկո՛լ դավաճան»:
Իշխան Սաղաթելյանը հրահանգեց որեւէ այլ գործողություն չանել, միայն արգելափակել մուտքերը:
Ցուցահարները արգելափակել են ԱԳՆ շենքը և պահանջում են Փաշինյանի հրաժարականը
«Հայաստան» խմբակցության պատգամավոր Արամ Վարդեւանյանն ասաց, որ եկել են ԱԳՆ շենքի մոտ, քանի որ ԱԳՆ կոչվող կառույցն իր տեղում չէ, եթե լիներ՝ Բրյուսելի երեկվա հանդիպումն այլ ելք կունենար: Արամ Վարդեւանյանն ասաց, որ չեն հոգնելու եւ կոչ արեց հանուն Արցախի պայքարել մինչեւ վերջ: Երթի մասնակիցները կոչ էին անում «զարթնել եւ չմտածել միայն ստամոքսի մասին»:
Կարդացեք նաև
Իշխան Սաղաթելյանն ասաց, որ Նիկոլ Փաշինյանի եւ Ալիեւի ցանկացած պայմանավորվածություն չի լինելու, եւ դրա համար պետք է մարդիկ ոտքի կանգնեն ու միանան պայքարին:
Նա կոչ արեց այդ եւ հարեւանությամբ գտնվող նախարարություններում աշխատող քաղաքացիներին՝ միանալ պայքարին: Երթի մասնակիցները ծափահարություններով ողջունեցին նաեւ այն քաղաքացիներին, որոնք եկել էին աշխատանքի, սակայն չէին կարողանում մուտք գործել շենք:
Երթի մասնակիցները սկսեցին վանկարկել՝ «առանց Նիկոլ Հայաստան»:
Երթը մեկնարկել էր առավոտյան ժամը 8 անց 30-ին՝ Ֆրանսիայի հրապարակից:
Լուսինե ԲՈՒԴԱՂՅԱՆ
