Վերաքննիչ քրեական դատարանի դատավոր Լուսինե Հովհաննիսյանի նախագահությամբ պրոդյուսեր Արմեն Գրիգորյանին կալանավորելու դեմ ներկայացված բողոքի դատական նիստն այսօր ավարտվել է եւ որոշումը կհրապարակվի երկուշաբթի օրը, ժամը 11:00-ին: Այս մասին ասաց Արմեն Գրիգորյանի շահերի ներկայացուցիչ, իրավապաշտպան Ռուբեն Մելիքյանը:
«Մենք հասկանում ենք, որ «բարդ գործ» է եւ հույս ունենք, որ դատարանը բարձունքի վրա կգտնվի եւ այս ակնհայտ ապօրինությունը կվերացնի: Սովորական դատական նիստ էր: Մենք մեր դիրքորոշումն արտահայտեցինք, մեղադրանքի կողմը իր դիրքորոշումը արտահայտեց: Մենք գտանք, որ իրենց դիրքորոշումը որոշակի առումով մեր մոտեցումն է ավելի ամրապնդում: Իրենք պնդում են, որ խափանման միջոցը չպետք է փոխվի այն պնդմամբ, որ գրված է դատական ակտում, որ Արմեն Գրիգորյանը կարող է շարունակել իր կարծիքը արտահայտել: Գտնում են, որ ինչ-որ մտացածին դրդիչների, կազմակերպիչների վրա ազդեցություն կարող է գործադրել: Նրանք գտնում են, որ Արմեն Գրիգորյանը Ռուսաստանի քաղաքացի է եւ դա ուժեղացնում է ոչ իրավաչափ գործողությունների ռիսկը: Դե, եթե մեր դատախազությունը գտնում է, որ Ռուսաստանի քաղաքացի լինելը ավելի վտանգավոր է դարձնում, չգիտեմ, գուցե, էդպես լինում է»,-ասաց իրավապաշտպանը: Նա տեղեկացրեց, որ Արմեն Գրիգորյանը շնորհակալություն է հայտնում դատարանի մոտ հավաքված մարդկանց, իր ողջույններն է հղում, ասում, որ լավ է:
«Մի քիչ էլ սպասենք: Այս դեպքում դատարանը պետք է իր բարձրության վրա գտնվի եւ ասի, որ չի կարելի խմբագրել օրենսգիրքը, չի կարելի հնարել նոր հանցակազմեր»,-ասաց Ռուբեն Մելիքյանը:
Աշոտ ՀԱԿՈԲՅԱՆ
