Ադրբեջանի նախագահ Իլհամ Ալիևը Բաքվի 9-րդ համաշխարհային ֆորումում իր ելույթում հայտարարել է, որ հայկական կողմի հետ բանավոր պայմանավորվածություն է եղել՝ չբարձրացնել Արցախի կարգավիճակի հարցը, և եթե Երևանը շարունակի հավակնություններ ներկայացնել Ադրբեջանի տարածքային ամբողջականության նկատմամբ, նույնը իրենք կանեն:
«Եղել է բանավոր պայմանավորվածություն, որ «Ղարաբաղի կարգավիճակի» հարցը չի բարձրացվի: Բայց ցավոք, մենք Հայաստանի կառավարությունից լսում են հայտարարություններ այսպես կոչված «Լեռնային Ղարաբաղի կարգավիճակի մասին», ինչը միանգամայն հակաարդյունավետ է: «Լեռնային Ղարաբաղ» գոյություն չունի: Լեռնային Ղարաբաղի ինքնավար մարզը լուծարվել է 1991թ. վերջին Ադրբեջանի խորհրդարանի որոշմամբ: Մեր տարածքում նման վարչական կառույց չկա: Ուստի կարգավիճակի մասին ցանկացած հիշատակում կհանգեցնի միայն նոր խնդիրների: Հայաստանի կառավարությունը պետք է հասկանա դա և զերծ մնա պատմությունը վերախմբագրելու փորձերից»,- ասել է Ալիևը:
Նրա խոսքով՝ Եթե Հայաստանը կասկածի տակ է դնում Ադրբեջանի տարածքային ամբողջականությունը, ապա այդպիսով մղում է Բաքվին համանման քայլեր ձեռնարկել Հայաստանի տարածքների նկատմամբ:
«Եթե Հայաստանի շարունակի կասկածի տակ դնել տարածքային ամբողջականությունը, Ադրբեջանն այլ ընտրություն չի ունենա, քան կասկածի տակ դնել Հայաստանի տարածքային ամբողջականությունը: Հատկապես որ պատմական առումով Ադրբեջանը դա անելու ավելի շատ իրավունք ունի»,- սպառնացել է Ալիևը:
Կարդացեք նաև
Ադրբեջանի նախագահը նորից խոսել է այն մասին, որ 1920թ. նոյեմբերին՝ խորհրդային 6 ամիսներից հետո, խորհրդային իշխանությունը «վերցրել է մեր երկրի պատմական մասը՝ Զանգեզուրը, և այն միացրել Հայաստանին»:
Ալիևը հավելել է, որ «Հայաստանի կառավարությունը պետք է լավ յուրացնի Ղարաբաղյան երկրորդ պատերազմի դասերը և հրաժարվի Ադրբեջանի նկատմամբ ցանկացած տարածքային հավակնությունից»:
Ընդ որում` նա ընդգծել է, որ Ադրբեջանն իր սահմանադրության շրջանակում կապահովի «Ղարաբաղում ապրող հայ բնակչության իրավունքներն ու անվտանգությունը»:
«Մեկ այլ հարց, որի վրա ցանկանում եմ ձեր ուշադրությունը հրավիրել, կապված է Ադրբեջանում ապրող հայերի հետ: Ես կարծում եմ, որ Բրյուսելում եռակողմ հանդիպման արդյունքում ԵՄ խորհրդի նախագահ Շարլ Միշելի հայտարարությունը հստակ արտահայտում է այն, որ Ղարաբաղի հայ բնակչության իրավունքներն ու անվտանգությունը նույնպես նկատի կառնվի: Եվ մենք լիարժեք աջակցում ենք դրան: Մեր սահմանադրությունն ապահովում է Ադրբեջանում ապրող բոլոր մարդկանց անվտանգությունն ու իրավունքները: Ադրբեջանը բազմաէթնիկ երկիր է, և հայ բնակչությունն ամենամեծ ազգային փոքրամասնությունը չէ: Մեր սահմանադրությունը հավասար իրավունքներ է վերապահում Ադրբեջանում ապրող բոլոր ազգությունների, այդ թվում հայերի համար»,- ասել է նա:
Պատրաստեց Վիկտորյա ԱՆԴՐԵԱՍՅԱՆԸ
