ՀՀ ՊՆ-ում հավատարմագրված լրագրողներն այսօր եղան կենտրոնական հավաքակայանում եւ ծանոթացան զորակոչային գործընթացին:
Վիճակահանության հանձնաժողովի նախագահ, գնդապետ Սահակ Սահակյանը ծանոթացրեց վիճակահանության կարգին եւ տեղեկացրեց, որ վիճակահանության ամբողջ գործընթացը հեռարձակվում է տարածքային ստորաբաժանումներ՝ ծնողների համար:
Լրագրողների հարցին, թե Արցախ զորակոչ իրականացվո՞ւմ է, գնդապետը պատասխանեց. «Ռազմաքաղաքական ղեկավարությունը որոշել է, որ այս պահին Արցախում ծառայությունն իրականացվում է պայմանագրային զինծառայողներով: Մեր վերջին՝ 2020 թվականի ամռան զորակոչի ժամկետային զորակոչը մինչեւ օգոստոսի 30-ը կզորացրվի ու այլեւս Արցախում չենք ունենա ժամկետային զինծառայողներ: Արցախի համար մշակված է ծառայության գրավչության համար լուրջ փաթեթ, այն ներդրված է եւ ըստ դրա պայմանագրային զինծառայողներով համալրվում են ամբողջ Արցախի պաշտպանության բանակի թափուր հաստիքները»,-ասաց սպան:
Գնդապետը հավաստիացրեց, որ դա բավարարում է ծառայությունը կազմակերպելու համար: «Ես ասացի, որ գրավչության լուրջ փաթեթ է ներդրված եւ դրա հիման վրա հիմնականում Արցախի ռեսուրսից համալրվում է պայմանագրային զինծառայողների ուժերով, ինչի նպատակը ժամկետային զինծառայողներին առաջնագծից հանելն է, որպեսզի ժամկետային զինծառայողներով մարտական հերթապահություն չիրականացնենք սահմաններում»:
Կարդացեք նաև
Aravot.am-ի հարցին ի պատասխան, թե ըստ էության, Հայաստանն այսօր ամբողջությամբ սահման եւ առաջնագիծ է, գնդապետը կրկնեց արդեն ասածը, որ ձգտում են, որպեսզի հնարավորության սահմաններում ժամկետայիններով մարտական հերթապահություն չիրականացվի»:
Aravot.am-ը նաեւ հետաքրքրվեց, թե ինչ ասել է պայմանագրայինների համար գրավչության լուրջ փաթեթ եւ Հայաստանից ցանկություն հայտնողներ կա՞ն: «Այո, կան: Իսկ գրավչության փաթեթը հետեւյալն է: Նա գնում, այնտեղ բնակություն է հաստատում, եթե ապրում է ընտանիքով, բնակարանային պայմանները բարելավվում են, վարձատրության չափը փոխվում է, սոցիալական երաշխիքներն ավելի մեծ են, դրամական ապահովման չափը ավելի մեծ է: Իսկ ով չի ցանկանում մշտական այնտեղ բնակվել, գնում՝ գալիս է»,-եղավ պատասխանը:
Աշոտ ՀԱԿՈԲՅԱՆ
