Aravot.am-ի տեղեկություններով՝ հուլիսի 26-ին Արագածոտնի մարզի Ղազարավան գյուղում տեղի ունեցած կրակոցներից տուժած Վարդուհի Հակոբյանը եւ նրա որդին՝ Գոռ Հակոբյանը, պատահաբար են հրազենային վիրավորում ստացել: Նրանց կյանքին վտանգ չի սպառնում, այս պահին տանն են:
Ղազարավան գյուղի երիտասարդները այսօր ուշ գիշերին վիճաբանել են, վեճը տեղի է ունեցել հրազենային վիրավորում ստացած կնոջ տան հարեւանությամբ, նրանք վեճի ձայներից դուրս են եկել ու վիրավորվել: Վեճի մասնակիցներից Տիգրան Սարգսյանը Ղազարավանի գյուղապետ Արտակ Սարգսյանի հորեղբոր թոռն է:
Ըստ ՀՀ ոստիկանության հաղորդագրության՝ «Հուլիսի 26-ի գիշերը, ժամը 2.45-ին, ոստիկանության Աշտարակի բաժնում հաղորդում ստացվեց «Աշտարակ» բժշկական կենտրոնից. հրազենային վնասվածքներով բուժօգնության էին դիմել Ղազարավան գյուղի բնակիչ մայր ու որդի: Տասնհինգ րոպե անց հիվանդանոցից ստացվեց երկրորդ հաղորդումը. դեմքի քերծվածքներով բուժօգնության էր դիմել հոսպիտալացված կնոջ ավագ որդին` 30 տարեկան:
Աշտարակի օպերատիվ խումբն արդեն հիվանդանոցում էր, և նրանց հարցին որդիներն ու մայրը պատասխանեցին, թե վնասվածքները հասցրել է անհայտ անձը: Իրավապահները շուտով պարզեցին, որ նրանց հայտնածը հեռու չէ իրականությունից:
Կարդացեք նաև
Աշտարակի բաժնի և Արագածոտնի մարզային վարչության քրեական հետախույզների ձեռնարկած համատեղ միջոցառումների արդյունքում պարզվեց, որ գիշերվա ժամը երկուսի սահմաններում անձնական հարցերի շուրջ վեճ է ծագել տուժած քաղաքացիների 26-ամյա հարևանի և Աշտարակ քաղաքի Սիսակյան փողոցի բնակիչ, 28-ամյա երիտասարդի միջև, այդ ընթացքում աշտարակցին հոր «Իժ» հրացանից կրակել էր 26-ամյա ղազարավանցու ուղղությամբ: Նա փախել ու մտել էր հարևանի բակ։ Հետապնդելով նրան` աշտարակցին ևս մեկ կրակոց էր արձակել արդեն հարևան տան մոտ, ինչի հետևանքով էլ աղմուկից դուրս եկած մայրն ու որդիները ստացել էին հրազենային վնասվածքներ: Միջադեպին միջամտել էր ընտանիքի հայրը և աշտարակցու ձեռքից խլել հրացանը, ինչից հետո կրակոցներ արձակած երիտասարդը փախել էր։
Դեպքի վայրի զննությամբ հայտնաբերվել է երկու պարկուճ: Տարածքային քննչական մարմնում նախաձեռնվել է քրեական վարույթ։ Հանգամանքները նախաքննությամբ պարզվում են»։
Արփինե ՍԻՄՈՆՅԱՆ
