«Ականատես եղաք իրավական աբսուրդի։ Այն պայմաններում, երբ քրեական դատավարության օրենսգիրքն արգելում է կալանքից ազատվածին նորից կալանավորել առանց հիմքի, երբ մեղադրողը միջնորդեց գրավ կիրառել, դատավորը «խելահեղ» որոշում ընդունեց։ Սա մեկ բացատրություն ունի։ Սա իշխանության ուղիղ պատվերն է», – դատարանում այսօր մինչեւ կալանավայր ուղեկցվելը լրագրողների հետ ճեպազրույցում ասաց Ավետիք Չալաբյանը։
Հիշեցնենք, որ այսօր 12:30-ին դատավոր Մնացական Մարտիրոսյանը որոշեց երեք ամսով կալանավորել «Համախմբում» շարժման անդամ Ավետիք Չալաբյանին։ Ուշագրավ է, որ հանրային մեղադրող Արմեն Բեգլարյանը միջնորդել էր ոչ թե կալանավորել, այլ գրավ կիրառել։
«Այս դատավորն իրականացնում է Նիկոլ Փաշինյանի եւ նրա վարչակազմի ուղիղ պատվերը։ Այս վարչակարգը ենթադրում է, թե ինձ ազատազրկելով՝ լռեցնելու է իմ ձայնը։ Ոչ։ Կալանավայրում ես ավելի ազատ եմ, քան իրենք եւ իրենց ուսապարկերը։ Ես ազատ մարդ եմ, իսկ իրենք՝ ստրուկ, եւ ստրուկները վերջապես դուրս են մղվելու երկրից։ Այս դատավորը եւ նման մարդիկ պատասխան են տալու ինձ ապօրինի քրեական հետապնդման եւ ազատազրկման ենթարկելու համար։ Մեր տեղերը փոխվելու են, մենք դրան հասնելու ենք», -հավելեց Ավետիք Չալաբյանը։
Կարդացեք նաև
Հիշեցնենք, որ «ԱրԱր» հիմնադրամի համահիմնադիր, «Համախմբում» շարժման անդամ Ավետիք Չալաբյանը մեղադրվում է 2022թ․-ին դիմադրության շարժման ժամանակ երկու կամ ավելի անձանց, տվյալ դեպքում՝ ուսանողներին, հավաքներին մասնակցելու նպատակով նյութապես շահագրգռելու համար։ Նրա պաշտպանական թիմը հայտարարել է. «Մեղադրանքի հիմքում դրված է ընդամենը մեկ մոնտաժված և ՀՀ քրեական դատավարության օրենսգրքի իմաստով անթույլատրելի համարվող ձայնագրություն, որում Ավետիք Չալաբյանը հավաքներին մասնակցելու նպատակով նյութական շահագրգռվածություն առաջարկելու վերաբերյալ որևէ պնդում չի անում: Հակառակը, ի պատասխան ակնհայտ պրովոկացիա իրականացնող զրուցակից Թոռնիկ Ալիյանի հարցադրումների, պատասխանում է, որ «կյանքում կան ոչ նյութական արժեքներ, որոնք ավելի կարևոր են»։ Ալիյանն առերես հարցաքննության ժամանակ պնդել է, որ Ավետիք Չալաբյանը երբեք իրեն գումար կամ այլ նյութական շահ չի առաջարկել հավաքներին մասնակցելու համար։ Չկա որևէ ցուցմունք, այդ թվում՝ Թոռնիկ Ալիյանի, որով շոշափվում է նյութական շահագրգռվածության հասցեատեր որևէ երկրորդ անձի անուն»։
Լուիզա ՍՈՒՔԻԱՍՅԱՆ
