ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԱՌԱՋԻՆ ԳՈՒՄԱՐՄԱՆ ԳԵՐԱԳՈՒՅՆ ԽՈՐՀՐԴԻ 2022 ԹՎԱԿԱՆԻ ՕԳՈՍՏՈՍԻ 23-Ի ԽՈՐՀՐԴԱՆՇԱԿԱՆ ՆԻՍՏԻ
ՀԱՅՏԱՐԱՐՈՒԹՅՈՒՆԸ
1990 թվականի օգոստոսի 23-ին ընդունված Հայաստանի Անկախության մասին Հռչակագրով Հայ Ժողովուրդը իր հազարամյա պատմության ընթացքում ևս մեկ անգամ հռչակեց իր անկոտրում կամքը՝
– կառուցել ժամանակի պահանջներին համահունչ ժողովրդավարական պետություն և զարգացնել Սփյուռքի կառույցների հետ արդյունավետ համագործակցություն,
Կարդացեք նաև
– իրականացնել յուրաքանչյուր անհատի՝ սեփական հողի վրա անվտանգ, արժանապատիվ, հոգևոր և նյութական բարգավաճման կայուն երաշխիքներով արարելու` դարերի խորքից եկող մեր նախնիների երազանքը,
– դառնալ համաշխարհային հանրության լիիրավ անդամ և շարունակել համամարդկային քաղաքակրթության զարգացման գործում սեփական ներդրումն ունենալու` դարերի խորքից եկող մեր նախնիների առաքելությունը:
Այդ նպատակներին հասնելու անշրջելի երաշխիքներից էր 1988 թվականին սկիզբ առած Արցախյան շարժումը, որը վերածվեց համաժողովրդական և համազգային զարթոնքի, հանգեցրեց Հայաստանում, Արցախում և Սփյուռքում մեր ժողովրդի բոլոր հատվածների, ազգային կառույցների և անթիվ նվիրյալ անհատների համազգային նպատակների շուրջ աննախադեպ համախմբմանը:
Անցած տարիները մի կողմից երկու հայկական պետությունների կայացման և մեր հավաքական անվտանգությունը վտանգող տարաբնույթ սպառնալիքներին, այդ թվում Արցախի դեմ Ադրբեջանի՝ 1992-1994 և 2016 թվականների ռազմական ագրեսիաներին դիմակայելու տարիներ էին, մյուս կողմից՝ պետության հիմնադիր փաստաթղթերով սահմանված նպատակների ոչ արդյունավետ իրականացման կամ անտեսման, հասարակական կյանքում հանրության արդարացի դժգոհությունը հարուցող, անընդունելի երևույթների արմատավորման և բաց թողնված հնարավորությունների տարիներ:
Սակայն 2018 թվականից ի վեր Հայաստանի ներկա իշխանությունների կողմից իրականացվող քաղաքականությունը, որն ուղղակիորեն հակադրվում է Արցախի անվտանգությունն ապահովելու, Ադրբեջանից անկախ Արցախի կարգավիճակի միջազգային ճանաչմանը հասնելու, Հայաստանի ինքնիշխանությունն է՛լ ավելի ամրապնդելու և սահմանների անվտանգությունը երաշխավորելու մասին այդ նույն իշխանությունների նախընտրական խոստումներին, որևէ կերպ չի կարող արդարացվել նախկինում թույլ տրված սխալներով: Ավելին, նման փորձերը բարոյական չեն և պատասխանատվությունից խուսափելու անհաջող փորձեր են:
Ներկայումս Հայաստանի և Արցախի պետական կառույցների գործողություններն ու անգործությունը միտված են՝
– Արցախը Ադրբեջանին փոխանցելուն,
– Հայաստանի ռազմավարական նշանակության տարածքները և կապուղիները Ադրբեջանին հանձնելուն,
– «խաղաղության» քարոզչության քողի տակ, կազմալուծվող պաշտպանական համակարգի և պառակտված հասարակության պայմաններում, հակառակորդի կողմից նոր պատերազմ հրահրելուն՝ հերթական ծրագրավորված պարտությամբ:
Այդ ամենին զուգահեռ ի հայտ են գալիս նոր ավերածություններ և մահեր՝ բացահայտելով օրվա իշխանավորների հանցավոր անպատասխանատվությունը, անկարողությունը, հանրային ցավի հանդեպ անտարբերությունը:
Առավել քան ակնհայտ է, որ հայկական երկու պետությունների իշխանությունների գործունեությունը ոչ միայն չի բխում Հայաստանի Անկախության Հռչակագրի սկզբունքներից, այլև ուղղակիորեն հակասում է պատմական և իրավաքաղաքական բացառիկ կարևորության այդ փաստաթղթի տառին և ոգուն:
Արդյունքում ոչ միայն արցախահայությունն է հայտնվել ավելի քան 32-ամյա ազատագրական պայքարի արդյունքների կորստի իրական սպառնալիքի առջև, այլև վտանգված է Հայաստանի ինքնիշխանությունը, տարածքային ամբողջականությունը և սահմանների անձեռնմխելիությունը:
Մենք՝ ՀՀ Առաջին գումարման Գերագույն խորհրդի պատգամավորներս, տագնապներով լի և բախտորոշ այս օրերին՝
– վերահաստատելով մեր հավատարմությունը Անկախության Հռչակագրին,
– ընդունելով սեփական պատասխանատվության մեր բաժինն անցած տասնամյակների ընթացքում Անկախության Հռչակագրի սկզբունքների իրականացման խնդրում սկզբունքային և հետևողական չլինելու համար,
– գիտակցելով մեր պատասխանատվությունը երկրի ապագայի հանդեպ,
– վառ պահելով ադրբեջանական ցեղասպան քաղաքականության անմեղ զոհերի և ռազմական ագրեսիաները հետ մղելու ճակատամարտերում հերոսացած նահատակների հիշատակը՝
Կոչ ենք անում մեր ժողովրդի բոլոր հատվածներին՝ թոթափել հուսահատ դատապարտվածության և կուրացնող ատելության զգացումները, Հայաստանի, Արցախի և Սփյուռքի առկա վիճակը չհանդուրժող բոլոր ուժերին՝ անտեսել անցյալում և ներկայումս գոյություն ունեցող տարաձայնությունները, համախմբվել և միասնական ջանքերով կասեցնել գնալով նոր թափ առնող ազգակործան գործընթացը:
ՀՀ Առաջին գումարման Գերագույն Խորհրդի խորհրդանշական նիստի մասնակից պատգամավորների անունից՝
նիստը նախագահող
Խոսրով ՀԱՐՈՒԹՅՈՒՆՅԱՆ
Կիմ ԲԱԼԱՅԱՆ
