Տավուշի մարզի Բերդ համայնքում 2022 թվականի սեպտեմբերի 25-ին կայացած տեղական ինքնակառավարման մարմինների ընտրությունների քվեարկության արդյունքների վերահաշվարկի դիմումներ են ներկայացվել թիվ 38 ընտրատարածքային ընտրական հանձնաժողովում։ Այդ մասին Aravot.am–ի հետ զրույցում նշեց թիվ 38 ընտրատարածքային հանձնաժողովի նախագահ Աիդա Սարգսյանը։
«Թվով 6 ընտրատեղամասերի վերահաշվարկի դիմումներ են ներկայացրել ՔՊ-ի վստահված անձիք, ևս 3 ընտրատեղամասի քվեների վերահաշվարկ կկատարվի վիճակահանությամբ՝ մեր կողմից»,- նշեց Սարգսյանը։
Հավելենք, որ վերահաշվարկների աշխատանքները բոլոր ընտրատարածքային ընտրական հանձնաժողովներում կմեկնարկեն այսօր՝ 2022 թվականի սեպտեմբերի 27-ին, ժամը 14:00-ից:
Հիշեցնենք, որ ըստ ԿԸՀ-ի՝ Բերդ համայնքում կայացած ՏԻՄ ընտրություններում հաղթանակ է տարել Հարություն Մանուչարյանի գլխավորած «Զորավոր համայնք» դաշինքը՝ ստանալով 51,6% քվե։
Կարդացեք նաև
ՍԵպտեմբերի 25-ին ՀՀ քննչական կոմիտեն հաղորդագրություն էր տարածել, ըստ որի ՀՀ քննչական կոմիտեի Տավուշի մարզային քննչական վարչությունում քննվող քրեական վարույթի շրջանակներում՝ մեղադրանք է առաջադրվել ՀՀ Տավուշի մարզի Բերդի համայնքապետարանի աշխատակազմի քարտուղարին և նույն համայնքի Ներքին Կարմիրաղբյուր բնակավայրի վարչական ղեկավարին։ Վերջիններս մեղադրվում են «Ներքին Կարմիրաղբյուրի մանկապարտեզ» ՀՈԱԿ-ի տնօրենի ժամանակավոր պաշտոնակատարին դաշինքում ընդգրկվելու և նույն դաշինքի օգտին քարոզչություն կատարել հարկադրելու մեջ։
Լիա ՃԱՂԱՐՅԱՆ
