Վարչապետի տիկին Աննա Հակոբյանը հոկտեմբերին մի գրառում էր կատարել՝ կից հրապարակելով 44-օրյա պատերազմում զոհված Արման Ազատյանի շիրմաքարի եւ նրա նորածին եղբոր լուսանկարը։ Մի շարք լրատվամիջոցների հետ զրույցում Արման Ազատյանի հայրը՝ Վիգեն Ազատյանը բարձրաձայնել էր, որ պահանջում է հեռացնել իր ընտանիքի լուսանկարը։ Աննա Հակոբյանը, սակայն, այն չէր հեռացրել։
Վիգեն Ազատյանն այսօր լրագրողների հետ զրույցում ասաց․ «Կարծում եմ ձեզ հետաքրքիր կլինի իմանալ, որ ես խոսել եմ իր որդու հետ՝ Աշոտիկի։ Իր բառերից հասկացվեց, որ Աննային թվում է, թե իրավասու է առանց ինձ ասելու տեղադրել իմ ընտանիքի նկարներն ու ինչ-որ անիմաստ, աբսուրդ տեքստ գրել։
Իր բառերով՝ ինքն ասում է, թե ոչ մի վատ բան չի գրել, թե որդուս է մեծարում․․․Իմ պատասխանն այն է, որ իրավունք չունի մեծարելու։ Մեր հարցերն իրար մեջ շարունակվում են, դեռ չգիտեմ ինչ կլինի»։
Կարդացեք նաև
Աննա Հակոբյանի մեկ այլ՝ նոյեմբերին արված գրառման մեջ էլ հետեւյալ տողերը կային․ «Իմ հարազատ Տարոննե՛ր, Աբաջյաննե՛ր, Մխիթարնե՛ր, Ալբերտնե՛ր, Ալեննե՛ր, Արսեննե՛ր, Կյաժե՛ր, Գոռե՛ր, Ազատնե՛ր, Գեւորգնե՛ր, Կարեննե՛ր, Խաչատուրնե՛ր, Աշոտնե՛ր, Արմեննե՛ր, Արեննե՛ր, Ժորանե՛ր: Ի՛մ տղաներ»։
44-օրյա պատերազմում զոհված Մխիթար Գալեյանի մայրը՝ Աստղիկ Գալեյանն էլ իր հերթին կարծիք հայտնեց, որ Աննա Հակոբյանի նման գրառումները ծնողներին նյարդայնացնելու, հունից հանելու նպատակ ունեն․ «Ուզում ենք անգամ արհամարհել իր գրառումներն ու պահվածն առհասարակ։ Մենակ մի բան կասեմ՝ աստված չանի, որ Մխիթարը նման հարազատ ունենար, որովհետեւ գրել է, թե դուք իմ հարազատներն եք․․․սա ծնողներիս ավելի նյարդայնացնելու համար է»։
Լուիզա ՍՈՒՔԻԱՍՅԱՆ
