Ռազմական փորձագետ Կարեն Վրթանեսյանի դիտարկմամբ՝ Ադրբեջանի գլխավոր շտաբի պետի կողմից Հայաստանի հետ սահմանին գտնվող «Կոմանդոս» զորամաս եւ այլ զորամասեր կատարած այցը սովորական աշխատանք է, բայց Ադրբեջանի սովորական ռազմական աշխատանքը ուղղված է Հայաստանի դեմ, ներառյալ՝ Արցախը:
Նրա խոսքով՝ իրենց ցանկացած գործունեություն պետք է դիտարկել հենց այդ տեսանկյունից:
Հիշեցնենք, որ Ադրբեջանի գլխավոր շտաբի պետն իր այցի ընթացքում հանձնարարել է հետեւել անձնակազմի լեռնային ինտենսիվ պատրաստվածությանը, ինչպես նաեւ հանձնարարել է զինծառայողների գործնական պարապմունքների ընթացքում հիմնական ուշադրությունը դարձնել մարտավարության մեթոդներին։
Ինչ վերաբերում է եվրոպացի դիտորդների՝ առաջիկայում 2 տարով Հայաստանում դիտորդական առաքելություն, այդ թվում նաեւ պարեկություն իրականացնելու նախաձեռնությանը՝ Կարեն Վրթանեսյանի համար մնում է հարցական՝ ինչ նպատակով են դիտորդները պարեկություն անելու. «Ինձ համար անհասկանալի է, ինչ է նախատեսվում Հայաստանի ամբողջ տարածքում, որ իրենք պետք է Հայաստանի ամբողջ տարածքում ինչ-որ դիտորդական առաքելություն իրականացնեն, կարծես թե դրան որեւէ բացատրություն չի հնչել»:
Կարդացեք նաև
Կարեն Վրթանեսյանն իր վարկածն ունի՝ Հայաստանի տարածքում ադրբեջանցիների վերաբնակեցում է լինելու. «Դա վարկած է, որը կյանքի իրավունք ունի: Հակառակ դեպքում որն է իմաստը եվրոպացի դիտորդներ բերելու Հայաստանի ամբողջ տարածքում ինչ-որ առաքելություն իրականացնելու մանդատով»:
Անզեն դիտորդները ինչ կկարողանան անել հնարավոր պատերազմի ժամանակ, փորձագետը նկատեց. «Առավելագույնը, որ կկարողանան անել, հուզիչ գրառումներ անել թվիթերում: Համաշխարհային փորձը ցույց է տալիս, որ քաղաքացիական դիտորդները ռազմական գործողություններ սկսելու դեպքում ուղղակի դուրս են գալիս ռազմական գործողությունների տարածքից: Այդպես եղավ Դոնբասում, այդպես է լինում բոլոր կոնֆլիկտների ժամանակ: Դիտորդների աշխատանքային պայմանագրերում իրենց կյանքը վտանգելու հանգամանք չի նշվում»:
Արփինե ՍԻՄՈՆՅԱՆ
