Այսօր ԱԺ ֆինանսավարկային եւ բյուջետային հարցերի հանձնաժողովը առողջապահության հարցերի հանձնաժողովի հետ համատեղ նիստում պարզաբանումներ պահանջեց Հաշվեքննիչ պալատից եւ առողջապահության նախարարությունից:
Հիշեցնենք, որ առողջապահության նախարարությունում ամբուլատոր-պոլիկլինիկական բուժօգնության ծառայությունների, ինչպես նաեւ սոցիալապես անապահով եւ առանձին խմբերի անձանց բժշկական օգնության նկատմամբ Հաշվեքննիչ պալատը հաշվեքննություն էր իրականացրել, որի արդյունքներն ու եզրակացությունը կասկածների տեղիք էին տվել:
Անապահով եւ առանձին խմբերի անձանց բժշկական օգնության նկատմամբ հաշվեքննությունը ցույց է տվել, որ նախ սահմանափակ տեղեկատվություն են տվել պալատին, մասնավորապես, նախարարությունը չի տրամադրել ծրագրի ընթացքում ծառայություններից օգտված եւ էլեկտրոնային «Արմեդ» համակարգում արձանագրված դեպքերի, շահառուների նույնականացման, ինչպես նաեւ քաղաքացիներին տրամադրված ուղեգրերի մասին տեղեկատվություն: Նախարարությունը չի ունեցել ծրագրի իրականացման նպատակային ցուցանիշներ, ուստի հնարավոր չէ գնահատել արդյունավետությունն ու արդյունքները:
Հաջորդ էական հարցը վերաբերում է գների ձեւավորմանն ու հաշվարկմանը: Հաշվեքննության ընթացքում պարզվել է, որ նախարարը հայտարարել է անվճար տրամադրվող ծառայությունների գները, բայց թե ինչ մեթոդաբանությամբ են այդ գինը հաշվարկել, որտեղից են վերցրել, տեղեկատվություն չկա:
Կարդացեք նաև
Պետբյուջեի միջոցների տնտեսման, նպատակային ծախսման նպատակով պիտի լինեն հսկման համակարգեր, բայց նախարարությունում այդ ժամանակահատվածում ներդրված չի եղել ներքին աուդիտի համակարգը եւ լիարժեք չի գործել պայմանագրով նախատեսված ստուգման գործառույթը:
ՔՊ պատգամավոր Լուսինե Բադալյանը հարցրեց՝ ինչո՞վ է պայմանավորված տեղեկատվության չտրամադրումը, ինչպե՞ս են բացատրել նախարարությունից: Հաշվեքննիչ պալատի 7-րդ վարչության պետ Խաչիկ Փափազյանը պատասխանեց, որ դա պայմանավորված է եղել սկսած անձնական տվյալների գաղտնիությունից, օրենքի սահմանափակումից, մինչեւ «Արմեդ» համակարգից տվյալների արտահանման դժվարությամբ: Այնուամենայնիվ, արդյունքում հնարավոր չի եղել գնահատել ծրագրի նպատակային արդյունավետությունը, ծախսային արդյունավետությունը:
«Հայաստան» խմբակցության պատգամավոր Արթուր Խաչատրյանը հարցրեց. «Հաշվետվությունը թերի է, ոչ լիարժեք տեղեկատվության հիման վրա ներկայացված հաշվեքննությունը չի կարող լինել ամբողջական: Առողջապահության նախարարությունը չի տրամադրում տեղեկությունը, չի ասում՝ չեմ ուզում ՝ չեմ տալիս, հիմնավորումներ կարող է բերել բազմաթիվ՝ սկսած նրանից, թե «Արմեդից» գնա հանիր: Ավելի կարեւոր խնդիրը հետեւյալն է՝ ո՞ւմ եք տվել օգնությունը: Կարող է առողջ մարդու փող եք տրամադրել եւ երկրորդը՝ այդ ծառայության արժեքից 5 անգամ, ավելի: Եթե այդ կարեւոր տեղեկությունները չկան, մենք ի՞նչ ենք չափել, դա նույնն է, որ սխալ տոնոմետրով չափես մարդու ճնշում»:
Նարեկ Զեյնալյան
Առողջապահության հարցերի հանձնաժողովի նախագահ Նարեկ Զեյնալյանն ասաց, որ եթե նախարարությունը այդ տվյալները տրամադրեր, օրենք կխախտեր, իրավունք չուներ:
Իսկ Հաշվեքննիչ պալատի նախագահ Ատոմ Ջանջուղազյանը պատասխանեց, որ նոր օրենսդրական փաթեթ է մշակվում, ըստ որի, եթե որեւէ պետական պաշտոնյայի հասանելի է տեղեկատվությունը, այն պետք է տրամադրվի եւ հասանելի լինի նաեւ Հաշվեքննիչ պալատին: Դա հնարավորություն կտա լուծել այդ հարցը:
Հռիփսիմե ՋԵԲԵՋՅԱՆ
