Ադրբեջանի հարցերով փորձագետ Արմինե Ադիբեկյանը «Հայելի» ակումբում անդրադարձավ Երեւանի փոխքաղաքապետ, ժամանակին առողջապահության նախարար Արսեն Թորոսյանի տեղակալ Գեւորգ Սիմոնյանին կորոնավիրուսի համավարակի տարածման շրջանում ենթադրյալ չարաշահումների՝ 120 մլն. դրամ հափշտակելու կասկածանքով կալանավորմանը: «Ակնհայտ էր, որ Նիկոլ Փաշինյանը իր հետ բերել է ծայրահեղ այլասերված կոռուպցիայի ձեւ: Նախկինները, ինչքան էլ նրանց մասին ասենք, գոնե սկզբում կատարում էին իրենց պարտականությունները, հետո նոր անցնում էին բուն կոռուպցիոն գործողություններին: Ի դեպ, ասեմ, որ ոչ մեկը սրանց չհաջողվեց ապացուցել: Դա էլ է շատ կարեւոր: Ես արդեն ձեզ նայելով սկսում եմ մտածել. կարո՞ղ է ձեզանից առաջ կոռուպցիա չկար: Որովհետեւ ձեւ չկա, որ հինգ տարի փորեք ու չկարողանաք գոնե մի դեպք բերեք, հասցնեք դատավճռի:
Ինչ վերաբերում է կորոնային եւ մսխած գումարներին: Առաջին հերթին եկեք հիշենք, որ այդ ժամանակվա նախարարի կինը տենդեր շահեց ու շատ լուրջ գումար ստացավ պետությունից: Ուզում եմ հասկանալ, թե ինչո՞վ է նախարարի կինը լավ, որ պետության փողերը լցնում իր կլինիկան: Դա առաջին կոռուպցիոն զանգն էր եւ դրսեւորումը: Դրա համար նախ այդտեղից սկսեք, հետո կանցնեք մյուս բոլոր հետաքրքիր հանգամանքներին: Կամ ո՞նց ստացվեց, որ այս պուճուր Հայաստանում փոխնախարարը միլիոններ է մսխում ու, պատկերացրեք, նախարարը ոչնչից տեղյակ չէ: Դա հնարավոր չէ, որովհետեւ փոխնախարարը եթե ինչ-որ բան ստորագրում է, վերջինը դրվում է նախարարի ստորագրությունը: Այսինքն, ի՞նչ է ստացվում. Այն ժամանակվա նախարար, դու որ մի բան ստորագրում ես, չես կարդո՞ւմ, չես հետեւո՞ւմ, թե պետական փողերը որտեղ է ծախսում քո փոխնորդը: Այսինքն, մենք այստեղ ունենք անփութություն, պարտականությունների ոչ պատշաճ կատարում, կամ դու հանցակից ես:
Այսինքն, խոսել այն մասին, թե մի ինչ-որ սլաքավար դրել ու գռփել է, այդպես չի լինում: Ավելին, վստահ եմ, որ այդ Սիմոնյանի «աշխատած» փողերն ավելի քիչ են, քան ավելի «հավես տղերքինը», որոնք փորձում են իրենց մեղքը ջարդել սլաքավարի վրա: Հիմա այդ Սիմոնյանը թող գնա, նստի, կամ պատմի: Պատմի, թե ոնց է ստացվել, որ մսխել է պետական փողերը: Էլ չեմ ասում, որ իր հայրենակիցներին մատնել է դաժան մահվան»,-ասաց տիկին Ադիբեկյանը:
Աշոտ ՀԱԿՈԲՅԱՆ
