Եվրամիության տարածած հաղորդագրության համաձայն՝ ԵՄ խորհրդի նախագահ Միշելը շարունակել է սերտ կապի մեջ լինել Հայաստանի և Ադրբեջանի ղեկավարների հետ՝ առաջ մղելու համար ԵՄ ջանքերը՝ նպաստելու Հարավային Կովկասում կայունությանը և երկու երկրների միջև հարաբերությունների կարգավորմանը:
Ղեկավարները պայմանավորվել են կրկին հանդիպել 2023թ. մայիսի 14-ին Բրյուսելում:
Այս քննարկմանը կհաջորդի մեկ այլ հանդիպում Ֆրանսիայի նախագահ Էմանուել Մակրոնի և Գերմանիայի կանցլեր Օլաֆ Շոլցի հետ`2023թ. հունիսի 1-ին Քիշնևում կայանալիք Եվրոպական քաղաքական համայնքի գագաթնաժողովի շրջանակներում:
Ղեկավարները նաև պայմանավորվել են շարունակել եռակողմ հանդիպումները Բրյուսելում այնքան հաճախ, որքան անհրաժեշտ է՝ տեղի ունեցող զարգացումներին և բրյուսելյան հանդիպումների մշտական օրակարգային հարցերին անդրադառնալու համար։
Կարդացեք նաև
Նախագահ Միշելը նաև մտադրություն է հայտնել Հայաստանի, Ադրբեջանի, Ֆրանսիայի և Գերմանիայի ղեկավարներին հրավիրել հանդիպման երկրորդ անգամ՝ 2023թ. հոկտեմբերին Գրանադայում կայանալիք EPC-ի հաջորդ գագաթնաժողովի շրջանակներում:
Հիշեցնենք. ԱՄՆ պետքարտուղարությունը ողջունել է Հայաստանի և Ադրբեջանի առաջնորդների՝ մայիսի 14-ին Բրյուսելում նախատեսված հանդիպումը: Պետքարտուղարության Եվրոպայի ու Եվրասիայի վարչության թվիթերյան գրառման մեջ ասված է.
«Սա կարևոր հնարավորություն է զարգացնելու առաջընթացը Վաշինգտոնի բանակցություններից հետո», – ասված է հաղորդագրությունում:
Պատրաստեց Վիկտորյա ԱՆԴՐԵԱՍՅԱՆԸ
