«Ապաշրջափակման մասով մի կարևոր բան կա, որը կարծում եմ՝ այլևս հստակ է բոլոր ներգրավված գործընկերների համար, որ սահմանային ծառայությունների ամբողջ վերահսկողությունը լինելու է հայկական կողմի վերահսկողության տակ։
Ապաշրջափակումը ՀՀ կոնտեքստում նշանակում է, որ սահմանային բոլոր ծառայությունները իրականացվում են ՀՀ ծառայությունների կողմից։ Այս հարցում Հայաստանի դիրքորոշումը շատ հստակ է, կարծում եմ՝ դա ի գիտություն են ընդունել, և հույս ունենք այս սկզբունքով առաջ կշարժվեն նաև մյուս գործընկերները»,- Հանրային հեռուստաընկերության «Լուրեր» ծրագրին տված հարցազրույցում, օրերս հայտարարել էր ԱԽ քարտուղար Արմեն Գրիգորյանը՝ խոսելով Ադրբեջանի հետ կնքվելիք խաղաղության պայմանագրի մասին:
ԱԽ քարտուղարն ընդգծել է, որ միջանցք բառի վերաբերյալ Հայաստանի մոտեցումները 2020 թվականից հետո որևէ փոփոխության չեն ենթարկվել, իսկ ապաշրջափակման հարցում երեք հիմնական սկզբունք կա, որին Հայաստանը հետևում է. դա սուվերենությունն է, իրավորությունը և փոխադարձությունը։
Քանի որ ԱԳ նախարարն այսօր խորհրդարանում հրաժարվել էր լրագրողների հարցերին պատասխանել, լրագրողներին հետաքրքրող հարցն այսօր ԱԺ Եվրոպական ինտեգրացիայի եւ Ֆինանսավարկային հանձնաժողովի համատեղ նիստում հնչեցրեց «Հայաստան» խմբակցության պատգամավոր Արթուր Խաչատրյանը:
Կարդացեք նաև
Հարցը հետեւյալն էր՝ արդյոք նաեւ ՀՀ արեւմտյան սահմանը պետք է ՀՀ սահմանապահ ուժերը վերահսկեն, արդյոք սա Արմեն Գրիգորյանի՞ որոշումն է, թե՞ համայն իշխանության, ի՞նչ ռիսկեր կան այդ դեպքում:
Արարատ Միրզոյանը պատասխանեց՝ սահմանները, որոնք երկկողմ պայմանագրերով այլ վերապահումներ ունեն, չեն վերանայվում եւ ասաց՝ կարծում է, որ Արմեն Գրիգորյանն այդ մասին բան չի խոսել, քանի որ հարցազրույցն ինքը չէր նայել:
«Այն ենթակառուցվածքները, որոնք պետք է ապաշրջափակվեն կամ նորերը կառուցվեն, պետք է գործեն երկրների ենթակայության սուվերենության ներքո՝ փոխադարձության եւ հավասարության սկզբունքների հիման վրա: Մնացած դետալները դեռ բանակցվում են, այստեղ ես վերջնական բան չեմ կարող ասել»,- հավելեց նա:
Նելլի ԳՐԻԳՈՐՅԱՆ
