«Մարդու վրա թքելն արդարացում չունի» նման կարգախոսով այսօր ՀՀ կառավարության գլխավոր մուտքի մոտ գետնին պառկելու միջոցով իր բողոքն էր արտահայտում հայտնի ակտիվիստ Վարդգես Գասպարին:
Հիշեցնենք, որ ապրիլի սկզբին ՀՀ Ազգային Ժողովի նախագահ Ալեն Սիմոնյանը Կասկադում թքել էր քաղաքացու վրա՝ «դավաճան» վանկարկմանն ի պատասխան։ «Իրազեկ քաղաքացիների միավորումը» հանցագործության մասին հաղորդում էր ներկայացրել գլխավոր դատախազին՝ պահանջելով խուլիգանության հոդվածով վարույթ նախաձեռնել քաղաքացու դեմքին ենթադրաբար թքելու, իսկ պաշտոնատար անձի կողմից լիազորությունների չարաշահման հոդվածով՝ քննելու դաշնակցականին առերևույթ ապօրինի բերման ենթարկելու հանգամանքը։
Այս միջադեպից հետո, ի պատասխան «Ազատություն» ռադիոկայանի հարցի, թե ինչպես է վերաբերվում, երբ Հանրապետության երկրորդ պաշտոնյան թքում է մարդու վրա, որն իր կառավարությունը հայտարարել էր որպես բարձրագույն արժեք, ՀՀ վարչապետ Նիկոլ Փաշինյանն ասել էր. «Պաշտոնյան էլ է մարդ, ինքն էլ արժեք և դա չի նշանակում, որ իրա վրա կարելի է թքել, ես դատապարտում եմ թքելու բոլոր փորձերը, բոլոր մարդկանց վրա: Իհարկե, սխալ է տեղի ունեցել, բայց այդ սխալը տեղի է ունեցել ոչ թե նրա համար, որ այդ սխալի հեղինակը Հանրապետության երկրորդ պաշտոնյան է, տեղի է ունեցել նրա համար, որ այդ հանրապետության երկրորդ պաշտոնյան մարդ է, այ, եթե ինքը լիներ աստված էդ սխալն իրան թույլ չէր տա»:
«Մարդու վրա չթքելու համար պետք չի, որ Աստված լինի մարդը։ Մարդը ընդամենը պետք է ունենա տարրական դաստիարակություն։ Եվ դա արդարացում չունի։ Ուղերձն ուղղված է Նիկոլ Փաշինյանին, որ մարդու վրա թքելը ոչ մի արդարացում չունի»,– «Ֆակտորի» լրագրողին ասել է Վարդգես Գասպարին։
Կարդացեք նաև
Լուսինե ՄԱՐԳԱՐՅԱՆ
