Հայաստանի բանկերում ընդհանուր ավանդային պորտֆելը 2023 թվականի մայիսին կազմել է 5 տրիլիոն 147 միլիարդ 288 միլիոն դրամ, ինչը Հայաստանի պատմության համար ռեկորդային ցուցանիշ է: Այս մասին այսօր կառավարության նիստում ասաց վարչապետ Նիկոլ Փաշինյանը:
Նրա խոսքով՝ ապրիլին նույնպես ռեկորդային ցուցանիշ է գրանցվել․ «Նախորդ ամսվա համեմատ՝ 12 միլիարդ 841 միլիոն դրամի աճ ենք ունեցել: Սա այն ավանդային հաշիվներն են, որտեղ քաղաքացիները դրամ են պահում՝ իրենց խնայողությունները։ 2018 թվականի մայիսի նկատմամբ՝ 2023 թվականի մայիսին ավանդների պորտֆելը գրեթե կրկնապատկվել է, ավելի է ավելի քան 2,5 տրիլիոն դրամով կամ 96,7%-ով: Սրանք շատ կարեւոր ցուցանիշներ են։ Մեր բոլոր մարտահրավերներին մեր արձագանքը շատ կարեւոր է, որ լինի այսպիսին եւ տնտեսական զարգացումն այն ամենաէական գործոնն է, որը մեզ պետք է հնարավորություն տա հասցեագրել մեր պետության առաջ ծառացած բոլոր հիմնախնդիրները»։
Փաշինյանն ասաց՝ ամեն տարի, երբ պետական բյուջեի եկամուտներն էականորեն ավելացվում են, դա միշտ համարվում է ռիսկային․ «Բայց պիտի գոհունակությամբ նշեմ, որ առաջին կիսամյակում մենք հարկային եկամուտների կատարման առումով ոչ միայն խնդիրներ չենք ունեցել, այլ էականորեն գերակատարում ենք։ Այսօրվա ցուցանիշները գոհունակություն են հարուցում»։
Նելլի ԲԱԲԱՅԱՆ
