Region Monitor. ԱՄՆ կոնգրեսական Աննա Էշուն և Ներկայացուցիչների պալատի խոսնակ Նենսի Փելոսին Ներկայացուցիչների պալատի 75 անդամների հետ նամակ են հղել նախագահ Ջո Բայդենին՝ կոչ անելով արձագանքել ԼՂ հումանիտար աղետին և պատասխանատվության ենթարկել Ադրբեջանին ԼՂ բնակչության էթնիկ զտումների համար:
Նամակում ներկայացվել է ԼՂ հումանիտար իրավիճակը և նշվել, որ ԱՄՆ-ն բարոյական պարտավորություն ունի անելու այն, ինչ անհրաժեշտ է՝ վերջ դնելու անհարկի տառապանքներին և ապահովելու, որ Ադրբեջանը բախվի էթնիկ զտումների հետևանքներին:
Նամակում առաջարկվել է գործի դնել Ազատության աջակցության ակտի 907 լրացումը, որն ԱՄՆ կառավարությանն արգելում էր ռազմական օգնություն տրամադրել Ադրբեջանին։ Նաև կոչ է արվել անձնական պատժամիջոցների ենթարկել Ադրբեջանի պաշտոնյաներին՝ կիրառելով «Մագնիտսկիի ակտը»։
Նամակի հեղինակներն առաջարկել են հումանիտար օգնություն տրամադրել ԼՂ-ից տեղահանված բնակչությանը և միջազգային հանրությանը կոչ արել՝ ներգրավվելու այդ գործում։ Կոչ է արվել միջոցներ ձեռնարկել՝ ապահովելու Լեռնային Ղարաբաղի բնակչության անվտանգ տարհանումը դեպի Հայաստան, այդ թվում՝ Լաչինի միջանցքում միջազգային դիտորդների տեղակայմամբ։ Ըստ նամակի հեղինակների՝ անհրաժեշտ է նաև ուղիղ շփումներ ունենալ Ադրբեջանի հետ՝ Լեռնային Ղարաբաղի իշխանություններին համաներում ապահովելու նպատակով։
