Եվրոպայի խորհրդի խորհրդարանական վեհաժողովը (ԵԽԽՎ) Ադրբեջանի, Լեհաստանի, Հունգարիայի, Հունաստանի, Իսպանիայի կառավարություններին կոչ է արել 3 ամսվա ընթացքում տեղեկատվություն տրամադրել լրտեսող ծրագրերի օգտագործման վերաբերյալ, ինչպես նաև ամբողջությամբ հետաքննել չարաշահումների բոլոր դեպքերը՝ հիմնվելով փաստարկված տեղեկատվության վրա, որ լրտեսող ծրագրերն անօրինական նպատակներով օգտագործվել են Եվրոպայի խորհրդի անդամ մի շարք երկրների կողմից: ։
ԵԽԽՎ-ի կողմից ընդունված բանաձևում ասվում է, որ Բաքուն Pegasus ծրագիրն օգտագործել է հայ-ադրբեջանական հակամարտության առնչությամբ 12 մարդու, այդ թվում` Հայաստանի պետական պաշտոնյային լրտեսելու համար։ Ըստ առկա տվյալների՝ Ադրբեջանի իշխանություններն օգտվել են Pegasus լրտեսական ծրագրի ծառայություններից նաև լրագրողներին, ոչ կառավարական լրատվամիջոցների սեփականատերերին, քաղաքական ընդդիմախոսներին և քաղաքացիական հասարակության ակտիվիստներին լրտեսելու համար։
Ըստ ԵԽԽՎ-ի՝ պետությունները պետք է ձեռնպահ մնան լրտեսող ծրագրերից, քանի դեռ իրենց օրենքները, գաղտնի հսկողության պրակտիկան չեն համապատասխանում Կոնվենցիային և այլ միջազգային չափանիշներին: Խորհրդարանականները նաև տեղեկություն են խնդրել Իսրայելից՝ ԵԽԽՎ դիտորդ պետությունից, թե ինչ երաշխիքներ կարող են տրամադրվել, որ իսրայելական ընկերության կողմից վաճառվող Pegasus-ը, չարտահանվի այնպիսի երկրներ, որտեղ այն կարող է օգտագործվել մարդու իրավունքները ոտնահարելու համար։
