Մերձմոսկվայում դաժանաբար սպանվել են ռուսական ռոքի լեգենդ, լեգենդար «Ծաղիկներ» խմբի հիմնադիր, հայկական ծագում ունեցող Ստաս Նամինի (ԽՍՀՄ պետական գործիչ Անաստաս Միկոյանի թոռը) որդին և զոքանչը։ 30-ամյա ռեժիսոր Արտյոմ Միկոյանն ու վերջինիս 85-ամյա տատիկը՝ Պոլինա Տկաչենկոն, դանակի բազմաթիվ վնասվածքներով հայտնաբերվել են իրենց ամառանոցում։ Սպանությունը կատարվել է հոկտեմբերի 18-ի երեկոյան Իստրինսկի շրջանի Կրյուկովո գյուղում։
ԶԼՄ-ներում շրջանառվում է սպանության մի քանի վարկած։ «Իզվեստիա» պարբերականը՝ վկայակոչելով իր աղբյուրին հաղորդում է, որ բարեկամների միջև վեճ է ծագել տունը վաճառելու հարցով։ Վիճաբանության ժամանակ թոռը սպանել է տատիկին, ինչից հետո զանգահարել է 30-ամյա եղբորը և խոստովանել կատարվածը։ Եղբայրը ժամանել է դեպքի վայր և սպանվել է տղամարդու կողմից։ Այնուհետև մարդասպանը զանգահարել է ոստիկանություն և խոստովանել է իր մեղքը։
Ռոման Միկոյան
Shot տելեգրամյան ալիքն էլ հաղորդում է, որ մարդասպանը Ստաս Նամինի խորթ որդին է՝ 39-ամյա Ռոման Միկոյանը, որին զայրացրել է այն փաստը, որ իր տատը՝ Պոլինա Տկաչենկոն և կրտսեր եղբայրը՝ Արտյոմ Միկոյանը պարբերաբար քննադատել են իրեն, խնդրել դադարեցնել թմրանյութերի օգտագործումը։ Ըստ տեղեկատվության՝ սպանությունը ևս կատարվել է թմրանյութերի ազդեցության տակ։ Նշվում է նաև, որ Ռոման Միկոյանը նախկինում ևս մարդ է սպանել․ 2007 թվականին նա ոչ սթափ վիճակում մահացու վրաերթի է ենթարկել 42-ամյա կնոջ։ Նշվում է նաև, որ ոստիկաններին հաջողվել է բռնել կասկածյալին՝ Ռոման Միկոյանին, վերջինս հարցաքննվում է։
