«Մենք խոսում ենք կենսաբանական այն անվտանգության մասին, որը վերաբերվում է կանխամտածվածությանը: Ի՞նչ է անում ԱՄՆ-ը: Ոչ միայն մեր, այլեւ ամբողջ աշխարհի համար ամենագլխավոր վտանգը, որ ես համարում եմ, այն է, որ ԱՄՆ ամբողջ աշխարհում կառուցում է կենսաբանական լաբորատորիաներ, որոնց խնդիրը ոչ թե խաղաղ առողջապահությունն է, այլ ռազմական առողջապահությունը:
Երբ մենք 1991 թվականին առանձնացանք, առաջին տարիներին տարբեր պարբերականությամբ բոլորիս մոտ ԱՄՆ-ից գալիս էին ամբողջական հանձնաժողովներ, որոնց կազմում էին Պենտագոնի, ԿՀՎ-ի ներկայացուցիչները եւ բարի ժպիտով առաջարկներ անում, թե եկեք՝ մենք ձեր համար լաբորատորիաներ կառուցենք: Առաջին ինքնուրույն, տեխնոլոգիական հագեցվածությամբ լուրջ լաբորատորիան կառուցվել է Վրաստանում: Եվ այնտեղ աշխատում էին ԱՄՆ բանակի ռազմական միկրոկենսաբանները»,- ասաց Ռուսաստանի ԳԱ ակադեմիկոս , Ռուսաստանի կրթության ակադեմիայի նախագահի տեղակալ Գենադի Օնիշչենկոն՝ Մոսկվա-Աստանա-Բիշկեք-Երեւան-Մինսկ-Տաշքենդ հեռուստակամրջի ձեւաչափով «ԵԱՏՄ երկրների կենսաանվտանգությունը» թեմայով քննարկման ընթացքում պատասխանելով Հայաստանի հարցին, թե ՌԴ ԱԽՔ Նիկոլայ Պատրուշեւը վերջերս ԱՊՀ իր գործընկերների հետ հանդիպման ժամանակ ասել է, թե Ռուսաստանը պարբերաբար տվյալներ է ստանում վտանգավոր փորձարկումների մասին,որ արեւմտյան երկրները, առաջին հերթին, ԱՄՆ-ը, իրականացնում են հետխորհրդային տարածքներում:
Ըստ նրա՝ Հայաստանին առաջարկեցին կառուցել գերժամանակակից կենսաբանական լաբորատորիա, բայց այն չկառուցվեց։ Նման լաբորատորիա կա նաեւ Ադրբեջանում։
«Չեմ կարծում, թե երկար դատողություններ անելու անհրաժեշտություն կա, թե ինչով են զբաղվում ռազմական միկրոկենսաբանները եւ ինչով են զբաղվում մեր քաղաքացիական միկրոկենսաբանները: Այո, ռազմական միկրոկենսաբանները մշակում են պաշտպանական համակարգեր, բայց ամենից առաջ զբաղվում են հարձակվողական ծրագրերով: Այդպիսի ժամանակակից լաբորատորիաներ կառուցված են Վրաստանում, Ալմա-Աթայում, ներկայումս էլ կառուցվում է Ուզբեկստանի սահմաններին մոտ: Ինչպե՞ս են նրանք դա մեկնաբանում: Ասում են, իսկ եթե հանկարծ մեր զինվորականները գտնվեն մոտակայքում, մենք պետք է իմանանք, թե ինչպես նրանց պաշտպանենք: Բայց սա ոչ պրոֆեսիոնալների համար արդարացում է, որովհետեւ առաջին հերթին հարց է առաջանում, թե ձեր զինվորականները ինչ են անում մեր սահմանների մոտ, առավել եւս, որ մենք միմյանցից հեռու ենք գտնվում: Դրա համար հզոր, թանկարժեք , տեխնոլոգիապես հագեցած լաբորատորիաներ կառուցելու անհրաժեշտություն բացարձակապես չկա: Դա, իհարկե, հարձակվողական ծրագիր է: Այսպես մտածելու հիմք տալիս է Ռուսաստանի եւ Չինաստանի նախագահների հայտարարությունը՝ հասցեագրված ԱՄՆ-ին, որոնք մտահոգություն են հայտնել մեր սահմաններին մոտ հարձակվողական ծրագրերի առկայությամբ: Իսկ հզոր տերությունների ղեկավարները առանց առարկայական ապացույցների այդպիսի հայտարարություններ չեն անում»,-ասաց ակադեմիկոս Օնիշչենկոն:
Կարդացեք նաև
Աշոտ ՀԱԿՈԲՅԱՆ
