Հանրային լրագրության ակումբը, Հելսինկյան քաղաքացիական ասամբլեայի Վանաձորի գրասենյակը և «Իրավունքների պաշտպանություն առանց սահմանների» ՀԿ-ն իրականացնում են համատեղ հանրային արշավ՝ ուղղված ոստիկանական բարեփոխումներին։
Արշավի շրջանակում նախաձեռնվել է ստորագրահավաք՝ ուղղված ԱԺ նախագահին, ԱԺ պաշտպանության և անվտանգության, մարդու իրավունքների պաշտպանության և հանրային հարցերի, պետական-իրավական հարցերի մշտական հանձնաժողովներին, որպեսզի կազմակերպվեն ոստիկանության բարեփոխումների վերաբերյալ խորհրդարանական լսումներ, Ներքին գործերի նախարարը հրավիրվի Ազգային ժողով՝ պատասխանելու քաղաքացիների և լրատվամիջոցների ներկայացուցիչների հարցերին, տրամադրի պարզաբանումներ ձախողված բարեփոխումների վերաբերյալ։
Չնայած հայտարարված բարեփոխումներին՝ քաղաքացիները շարունակում են բախվել ոստիկանական բռնության քաղմասներում և ցույցերի ժամանակ, ոստիկանների անտարբերությանն ու վատ աշխատանքին, հաճախ՝ օրենքի չիմացությանը։ Հանցագործ, թե օրինապահ քաղաքացի, զոհված զինծառայողի հարազատ, թե ընդդիմադիր, հայաստանցի, թե զբոսաշրջիկ, փաստաբան, թե վստահորդ, վարորդ, թե ընտանեկան բռնության զոհ. համակարգի վատ ու բիրտ դրսևորումների հետ կարող է բախվել յուրաքանչյուրը։ Գումար, ջանք, ժամանակ՝ վատնվում են դանդաղ կամ սխալ ընթացող բարեփոխման, կամ, ավելի ճիշտ կլինի ասել՝ վերջինիս իմիտացիայի իրականացման համար։
Միացե՛ք ստորագրահավաքին՝ ՆԳ նախարարին ԱԺ կանչելու ու ոստիկանությունում տիրող իրավիճակի մասին լսումներ անցկացնելու պահանջով։
Կարդացեք նաև
ՀԼԱ
