Արտաքին գործերի փոխնախարար Վահան Կոստանյանն այսօր խորհրդարանում լրագրողների հետ ճեպազրույցում անդրադարձավ հարցին, որ ռուսական կողմը թույլ չի տվել Եվրամիության դիտորդներին մուտք գործել Ներքին Հանդ։
Հարցին, թե արդյոք քննարկվո՞ւմ է ռուսներին այնտեղից դուրս բերելու հարցը, Վահան Կոստանյանը պատասխանեց․ «Այն գործընթացները, որոնք տեղի են ունենում տարբեր գործընկերների, նաեւ ռուս գործընկերների հետ հատկապես վերջին շրջանում, բավական թափանցիկ են։ Եվ եթե լինեն նոր զարգացումներ, բնականաբար, բոլորը կտեղեկացվեն դրա մասին»։
«Առավոտի» հարցին, թե ի՞նչ իրավունքով են օտար երկրի ներկայացուցիչները ՀՀ տարածքում որոշումներ կայացնում, Վահան Կոստանյանը պատասխանեց․ «Մենք՝ որպես արտաքին գործերի նախարարություն, եւ ՀՀ կառավարության անունից կարող եմ ասել, որ որոշումները պետք է կայացվեն Հայաստանի Հանրապետության կառավարության ու համապատասխան գերատեսչությունների կողմից։ Իսկ եթե այս առումով եղել են գործողություններ, որոնք դրան հակասում են, ապա համարժեք պատասխան պետք է ստանան»։
Ռոզա ՀՈՎՀԱՆՆԻՍՅԱՆ
