Հոկտեմբերի 27-ի ահաբեկչությունը ուղղված էր պետության դեմ ու ՀՀ Ազգային ժողովում գնդակահարված 8 պետական պաշտոնյաների սպանությունը կոռուպցիայի մասին չէ, այլ՝ պետությունը գլխատելու, որի ուղիղ հետևանքն է մեր պետության այսօրվա վիճակը
Հայաստանի Հանրապետության հակակոռուպցիոն կոմիտեի նախագահ պարոն Սասուն Խաչատրյանին
1999թ. հոկտեմբերի 27-ի պետական ահաբեկչության զոհ ԱԺ փոխխոսնակ Յուրի Բախշյանի այրի Անահիտ Բախշյանից
ԴԻՄՈՒՄ
Կարդացեք նաև
Հարգելի պարոն Խաչատրյան, ս.թ. փետրվարի 5-ին միջնորդություն էի ներկայացրել ԱԱԾ-ի օպերատիվ գործունեության աջակցման վարչություն որոշակի հարցադրումներով, որին ի պատասխան փետրվարի 13-ին ինձ հայտնեցին, որ թիվ 62207199 քրեական վարույթի նախաքննությունը հանձնարարվել է ՀՀ հակակոռուպցիոն կոմիտեին:
Իհարկե, ես շատ տարակուսեցի և նամակով դիմել եմ ՀՀ գլխավոր դատախազին մի շարք հարցադրումներով, մասնավորապես, թե ի՞նչ տրամաբանված բացատրություն կա այս հանձնարարությանը: Հուսամ՝ պատասխան կստանամ:
Ի դեպ ասեմ Ձեզ, որ դեռևս 15.01.2020թ. միջնորդել էի ՀՀ գլխավոր դատախազին, որ չեմ վստահում ԱԱԾ-ին և խնդրում եմ այս գործը հանձնել Հայաստանի Հանրապետության հատուկ քննչական ծառայությանը, որը մերժվեց: Այսօր Ձեր ղեկավարած կառույցը կոչվում է հակակոռուպցիոն կոմիտե, այսինքն այս կոմիտեի գործունեության շեշտը դրվում է կոռուպցիոն քրեական գործառույթների վրա, այնինչ հոկտեմբերի 27-ի ահաբեկչությունը ուղղված էր պետության դեմ ու ՀՀ Ազգային Ժողովում գնդակահարված 8 պետական պաշտոնյաների սպանությունը կոռուպցիայի մասին չէ, այլ՝ պետությունը գլխատելու, որի ուղիղ հետևանքն է մեր պետության այսօրվա վիճակը:
Պարոն Խաչատրյան, ուզում եմ հասկանալ, թե ես, որպես այդ գործի վերաբացման դիմումատու, ինչպե՞ս պիտի Ձեզ հետ համագործակցեմ:
Ակնկալում եմ հանդիպում Ձեր նշանակած օրն ու ժամին:
Հարգանքներով՝ Անահիտ Բախշյան
28.02.2024թ.
