«ԱՄՆ դեսպանը ՀՀ-ն Նիկոլ Փաշինյանի իշխանությամբ համարում էր ժողովրդավարության փարոս։ Այսօր ինձ հետ բերել եմ թուրքական արտադրության լամպ։ Սա է Նիկոլի ժողովրդավարության փարոսը, որովհետև այս փարոսը լույս է տալիս ու աշխատում բացառապես Ադրբեջանի և Թուրքիայի համար»,-ՀՀ ԱԳՆ-ի դիմաց անցկացված բողոքի ցույցի ժամանակ հայտարարեց «Անվտանգություն եւ ժողովրդավարություն» իրավապաշտպան հասարակական կազմակերպության նախագահ Նաիրա Զոհրաբյանը՝ ձեռքին մի լամպ։
Young members of the Republican Party of Armenia hold a protest action in front of the RA Ministry of Foreign Affairs in Yerevan, Armenia
Ցուցարարները բարձրացրել էին «Ազատություն քաղբանտարկյալներին» կարգախոսներ, Արմեն Աշոտյանի, Վազգեն Սաղաթելյանի, Բակո Սահակյանի և այլոց նկարներով պաստառներ, Արցախի և ՀՀ-ի դրոշները։ Ցույցը տեղի է ունենում Եվրոպայի խորհրդի (ԵԽ) գլխավոր քարտուղար Մարիա Բուրիչի` ԱԳՆ-ում նախատեսված հանդիպման ընթացքում:
Նաիրա Զոհրաբյանը հիշեցրեց՝ նախկինում, երբ «որևէ ընդդիմադիրի «սանրվածքը ծռվում էր» կամ գրիպ էր ընկնում, ԵԽԽՎ-ն, Նախարարների կոմիտեն հայտարարություններ էին տարածում՝ ի պաշտպանություն քաղբանտարկյալների․ «Ինքս եղել եմ ԵԽԽՎ այն պատգամավորների թվում, որը կողմ է քվեարկել 2012-ին քաղաքական բանտարկյալ ձևակերպմանը և ամենայն պատասխանատվությամբ պնդում եմ, որ այսօր կալանքի տակ գտնվող Արմեն Աշոտյանը, Նարեկ Մալյանը, Նարեկ Սամսոնյանը, Վազգեն Սաղաթելյանը, Մամիկոն Ասլանյանը, եթե վերցնենք բացառապես ԵԽԽՎ-ի ընդունած քաղաքական բանտարկյալ ձևակերպումը, այդ ձևակերպման բոլոր 5 կետերով իրենք բոլորը քաղաքական բանտարկյալ են։ Ինչո՞ւ է ԵԽ-ն աչք փակում ՀՀ-ում այսօր տեղի ունեցող բռնապետության, քաղաքական բանտարկյալների այս մեծ թվի վրա»։
Կարդացեք նաև
Նաիրա Զոհրաբյանն ասաց՝ փորձելու է իր բերած լամպը հանձնել Մարիա Պեյչինովիչ Բուրիչին։
Խոսելով իրենց պահանջի մասին՝ Նաիրա Զոհրաբյանն ասաց․ «Պահանջում ենք, որ այստեղ ժամանեն ԵԽԽՎ ՀՀ-ի հարցով համազեկուցողները, անմիջապես, ինչպես Ադրբեջանի մասով, ամիսը մեկ հայտարարություն էր ընդունվում, որ այնտեղ քաղաքական բանտարկյալներ կան, մենք պիտի պահանջենք ԵԽ գլխավոր քարտուղարից, որ հրատապ կարգով բանաձև ընդունվի, քննարկում կազմակերպվի ՀՀ-ում քաղբանտարկյալների վերաբերյալ և ընդունվի բանաձև՝ պահանջելով ՀՀ ժողովրդավարության լամպուշկա իշխանություններին կալանքից ազատել բոլոր քաղաքական բանտարկյալներին»։
Տաթեւ ՀԱՐՈՒԹՅՈՒՆՅԱՆ
