Հայաստան-Ադրբեջան համաձայնեցված համաձայնագրի տեքստում որեւէ դրույթ չկա այսպես կոչված միջանցքի մասին․ այսօր ԱԺ արտաքին հարաբերությունների նիստում հայտարարեց ՀՀ ԱԳ նախարար Արարատ Միրզոյանը։
Հիշեցնենք, երեկ հայտնի դարձավ, որ Հայաստանի եւ Ադրբեջանի միջեւ բանակցվող խաղաղության պայմանագրի տեքստը համաձայնեցված է եւ պատրաստ է ստորագրման։
«Ընդհանրապես, ապաշրջափակման մեխանիզմների մասին որեւէ բան համաձայնագրի տեքստում չկա»,- հայտարարեց Արարատ Միրզոյանը՝ հավելելով, որ կա երկկողմ պատրաստակամություն երկկողմ համագործակցելու՝ տարբեր ոլորտներում, այդ թվում՝ նաեւ տրանսպորտային, տրանզիտ հարցերում։ Նա կարծում է, որ սա պետք է միջանցքի մասին բոլոր հնարավոր անհանգստությունները փարատի, մյուս կողմից էլ՝ ՔՊ-ական իշխանության մոտեցումը ապաշրջափակման մասին հայտնի է՝ հնարավորություն տալ երկու երկրներին օգտվել միմյանց երկաթուղային ցանցերից, հեշտացնել սահմանահատման գործընթացը՝ բեռների տեղաշարժի համար, բայց «ՀՀ բոլոր երկաթուղիները, ճանապարհները, երկաթուղիները մնալու են, գործելու են ՀՀ ինքնիշխանության ներքո» եւ որեւէ երրորդ ուժերի կողմից այդ ենթակառուցվածքների վերահսկման կարիք չկա, վերահսկողության համար կարելի է գործադրել միջազգային տարբեր մեխանիզմներ։
Կարդացեք նաև
Մանրամասները՝ տեսանյութում
Նելլի ԳՐԻԳՈՐՅԱՆ
