«Սա հերթական ձախողումն է ՀՀ իշխանությունների եւ մասնավորապես՝ դիվանագիտության: Միակ հիմնավորումը, որ ՀՀ արտգործնախարարը բերեց՝ այն էր, որ մեզ անհրաժեշտ է խաղաղություն, ինչը բխում է Հայաստանի շահերից: Այսինքն, Ադրբեջանն ինչ պարտադրել է, այս իշխանությունները համաձայնել են եւ հիմա այս իշխանությունները շանտաժի են ենթարկում Հայաստանի Հանրապետության ժողովրդին եւ համայն հայությանը, որ եթե հանկարծ մենք Ադրբեջանի պահանջներին չենթարկվեինք, պատերազմ կլիներ»,- լրագրողների հետ ճեպազրույցում ասաց ԱԺ «Հայաստան» խմբակցության պատգամավոր Արթուր Խաչատրյանը՝ անդրադառնալով Ադրբեջանի հետ խաղաղության համաձայնագրին, որի տեքստի շուրջ Փաշինյանի հայտարարմամբ համաձայնություն է ձեռք բերվել:
«Թե տիկին Քրիստինե Վարդանյանը, թե՛ ես երկու անգամ այդ հարցը տվեցինք, նշեք գոնե մի հարց, որտեղ Ադրբեջանը գնացել է զիջումների, որպեսզի կարողանանք ասել, որ եղել է փոխզիջում: Ալմա Աթայի մասին առաջինն Ադրբեջանն էր խոսում դեռեւս 2008թ դեկտեմբերի 29-ին… Եվ այնտեղ վարչական սահմանների մասին ընդհանրապես խոսք չկա: Այսինքն, եթե ՀՀ արտգործնախարարը չի կարողանում գոնե մի զիջում ներկայացնել Ադրբեջանի կողմից, ինչի՞ մասին է խոսքը»,- հավելեց ԱԺ «Հայաստան» խմբակցության պատգամավորը:
Նրա խոսքով. «Նիկոլ Փաշինյանը շտապում է, որովհետեւ ինքը եկել է իշխանության խաղաղություն հաստատելու խոստումով…2018թ նրա առաջին խոստումը երջանկությունն էր, 2021-ին խաղաղություն հաստատելը: Հիմա մնացել է մի տարի ու մի քանի ամիս, իրեն պետք է մի թղթի կտոր՝ անկախ բովանդակությունից, որ ինքը Չեմբեռլենի նման թափահարի եւ ասի՝ ես ձեզ խաղաղություն եմ բերել: Բայց էդ թուղթը՝ Չեմբեռլենի ստորագրած, ի՞նչ բերեց Եվրոպայի գլխին, դրա նման մի բան էլ սրանց արածն է բերելու Հայաստանի գլխին…»:
Լրագրողների հարցին՝ ինչ են պատրաստվում անել, Արթուր Խաչատրյանն ասաց, որ ողջ խմբակցության անունից չի կարող խոսել, հավաստիացրեց, որ կքննարկեն եւ տեղյակ կպահեն:
Կարդացեք նաև
Մանրամասն՝ տեսանյութում.
Գոհար ՀԱԿՈԲՅԱՆ
