«Հնչեղ անուններ կան, կենտրոնացել եք նրանց վրա, բայց բազմաթիվ սովորական մարդիկ, տարեց մարդիկ, այդ գերիների մեջ կան եւ եղել են, հիմա՝ 100-ից ավել գերիներ ազատ են արձակվել։ Մենք կարող ենք ասել, որ մենք շարունակում ենք այդ ուղղությամբ աշխատել եւ դա անում ենք ոչ թե ձեր ասելով։ Դա մեր պարտքն է՝ անում ենք։ Մենք համոզված ենք, որ պետք է ջանք չխնայել այդ ուղղությամբ եւ չենք խնայում։ Ուրիշ բան, որ արդեն ահագին ժամանակ է՝ այս հարցում հաջողություն չկա»,- ԱԺ արտաքին հարաբերությունների հանձնաժողովի նիստում այսօր հայտարարեց ԱԳ նախարար Արարատ Միրզոյանը՝ պատասխանելով ԱԺ «Հայաստան» խմբակցության պատգամավոր Ագնեսա Խամոյանի հարցին։
Ագնեսա Խամոյանը հետաքրքրվել էր՝ հաջողելո՞ւ է ՔՊ-ական իշխանությանը՝ Բաքվում գերեւարված ՀՀ քաղաքացիներին վերադարձնել Հայաստան։
«Ե՞րբ կլինի»,- ընդդիմադիր պատգամավորի ճշտող հարցին, Արարատ Միրզոյանը պատասխանեց․ «Երբ որ կլինի, երբ որ կկարողանանք եւ դա ձեր խաթր չի եւ ձեր պահանջից վախենալով չի, որովհետեւ դա մեր պարտքն է եւ պետք չի մեզ այդ մասին հիշեցնել»։
«Ձեր պարտքն է, Դուք պարտավոր եք ՀՀ քաղաքացիներին վերադարձնել ՀՀ եւ մի փորձեք մեր վրա կամ հայ ժողովրդի վրա վաճառել, որ ձեր գործողությունների արդյունքում, այն մարդիկ, ովքեր հայտնվել են Բաքվում գերության մեջ, Ձեզ հաջողվել է 100-ից ավել մարդու վերադարձնել ՀՀ։ Հարցս հստակ էր, ես երբեք որեւէ տարանջատում այդտեղ չեմ մտցնում՝ անունով է, անունով չի, հայտնի է, հայտնի չէ, հացադուլի մեջ է, հացադուլի մեջ չէ։ Բոլորին էր վերաբերվում՝ առնվազն 23-ին»,- արձագանքեց Ագնեսա Խամոյանը։
Կարդացեք նաև
«Եթե Դուք ըտենց, ես էլ ըսենց, տիկին Խամոյան»,- հայտարարեց Արարատ Միրզոյանը՝ ընդդիմադիրներին հորդորելով գերիների եւ զոհերի առումով շահարկումներ չանել։
Պատգամավորի եւ ԱԳ նախարարի միջեւ անհամաձայնություն կար նաեւ ԵՄ դիտորդների առնչությամբ:
Մանրամասները՝ տեսանյութում
Նելլի ԳՐԻԳՈՐՅԱՆ
