«ՀՀ իշխանությունը ոչ միայն այս, այլև բոլոր հարցերում առաջնորդվում է մեկ սկզբունքով․ երբ տեսնում է՝ խնդիր կա, որը իշխանությունը պահելու հետ է կապված, ընտրությունները հնարավորինս անցնցում իրականացնելու համատեքստում, դա է դիտարկում առաջնահերթություն, այլ պարագայում այս իշխանությունը որևէ առաջնահերթություն չունի խնդրին ուշադրություն դարձնելու տեսակետից»,- Ազատության հրապարակում լրագրողների հետ զրույցում ասաց ՀՀ ԱԺ «Պատիվ ունեմ» խմբակցության քարտուղար Տիգրան Աբրահամյանը։
Ինչպես արդեն տեղեկացրել ենք, ի պաշտպանություն արցախցիների իրավունքների հանրահավաքից հետո Ազատության հրապարակում վրաններ տեղադրվեցին։
Պատգամավորը չի կարծում, որ ՀՀ իշխանությունը նույնիսկ նվազագույն չափով գնալու է որևէ զիջման․ իրենց հռչակած առաջնահերթությունը արցախցուն հնարավորինս շուտ արտագաղթին մղելն է։
Լրագրողների դիտարկմանը՝ ՀՀ վարչապետ Նիկոլ Փաշինյանը հայտարարում է Ղարաբաղյան շարժումը մոռանալու մասին, Տիգրան Աբրահամյանն արձագանքեց․ «Եթե վաղը ՀՀ իշխանությունը հանձնի ՀՀ որևէ մարզ, նույնը ասելու է դրա դեպքում։ Այս իշխանությունը խնդիր ունի արդարացնելու իր տապալումները, ՀՀ-ի կամ Արցախի տարբեր հատվածների հանձնումը։ Բնականաբար, այդ ճանապարհին փորձելու է դրա համար չակերտավոր հիմնավորումներ մտածել։ Ինչ վերաբերում է արցախյան շարժմանը, ապա այդ շարժումն է բերել ՀՀ անկախությանը, մեր ժողովրդի վերածննդին ու զարթոնքին, դա է բերել ՀՀ ԶՈՒ կազմավորմանը։ Ես խոսում եմ մեր պետության համար կարևոր հենասյուների մասին, որոնք այս իշխանությունը հինգ-վեց տարվա ընթացքում ոչնչացրել է»։
Տաթև ՀԱՐՈՒԹՅՈՒՆՅԱՆ
